Anthony Davis

Anthony Davis, Jr., nado o 11 de marzo de 1993 en Chicago, Illinois, é un xogador de baloncesto profesional estadounidense que xoga nos Los Angeles Lakers da National Basketball Association (NBA). Xogou de ala-pivote para a Universidade de Kentucky antes de ser seleccionado na 1ª posición do Draft da NBA de 2012 polos New Orleans Hornets. Despois da súa temporada "rookie" na NBA, foi elixido no mellor quinteto de novatos da competición. No seu segundo ano foi elixido no Quinteto ideal da NBA.

Anthony Davis

Los Angeles Lakers – No. 3
Posición	Ala-pivote / Pivote
Liga	NBA
Información persoal
Nacemento	11 de marzo de 1993 (31 anos) Chicago, Illinois
Nacionalidade	Estados Unidos
Altura	2,08 m (6 ft 10 in)
Peso oficial	102 kg (225 lb)
Información da carreira
Instituto	Perspectives Charter (Chicago)
Universidade	Kentucky (2011–2012)
NBA Draft	2012 / Rolda: 1 / Elección: 1 Por New Orleans Hornets
Carreira	dende 2012
Historial de equipos
New Orleans Hornets / Pelicans (2012–2019) Los Angeles Lakers (2019–presente)
Premios e galardóns
6x NBA All-Star (2014–2019) 1× 1º Equipo All-NBA (2015) 1× Equipo All-Rookie (2013) 2× Máximo taponador da NBA (2014–2015) 1× Campión NCAA (2012) 1× Ouro olímpico (2012) 1× Campión do Mundo (2014)
Información en nba.com

Traxectoria

Instituto

Davis cos Wildcats.

Anthony Davis Jr. é fillo de Anthony e Eranier Davis. Naceu o 11 de marzo de 1993 no South Side de Chicago, Illinois. Ten unha irmá xemelga chamada Antoinette e unha irmá máis vella chamada Lesha, que tamén xogan a baloncesto. Na súa cidade natal acudiu ao Instituto Perspectives Charter School, un centro cun programa académico famoso polos seus programas de matemáticas e ciencias. O equipo do Perspectives milita nunha división da Chicago Public High School League, a chamada Blue Division, ignorada polos medios de comunicación debido ao baixo nivel da competición. No seu primeiro ano, Davis era coñecido como "O pequeno que lanza triplas desde a esquina". Ao finalizar o seu primeiro ano no instituto medra 10 centímetros e aínda que a tempada seguinte seguiu xogando por fóra, traballou o seu xogo interior adestrando co seu tío e os seus curmáns. Durante o seu ano júnior os seus pais pensaron en mudalo de instituto a un con maior repercusión nos medios. Con todo Donnie Kirksey, amigo do pai de Anthony, desaconsellou tal opción dicindo que "Se es bo, dá igual onde xogues, encontrarante".

Universidade

Tras terminar o instituto, Davis matriculouse na Universidade de Kentucky, onde pasou a formar parte do seu equipo de baloncesto, os Kentucky Wildcats dirixidos por John Calipari. Mesmo antes de que a súa carreira universitaria comezase, moitos analistas xa lle vían como futuro número 1 do Draft. Calipari comparou fisicamente a Davis con Marcus Camby, mais afirmando que o seu pupilo era mellor driblador e tirador que Camby.

No seu único ano universitario Davis fixo unha media de 14,2 puntos, 10,4 rebotes e 4,7 tapóns por partido, liderando a NCAA neste último apartado. Disputou un total de 40 partidos con media de 32 minutos por choque. Foi nomeado xogador do ano, novato do ano e mellor defensor do ano. Na final da Final Four da NCAA o seu equipo impúxose á Universidade de Kansas por 67-59 no Mercedes-Benz Superdome de Nova Orleáns. Aínda que non estivo moi acertado en ataque (1 de 10 en tiros de campo para un total de 6 puntos) o seu labor defensivo (16 rebotes e 3 roubos de balón) foron chave para o triunfo dos Wildcats. Uns días máis tarde declarouse escollíbel para o Draft de 2012.

Estatísticas

Ano	Equipo	PX	PT	MPP	%TC	%3P	%TL	RPP	APP	ROU	TPP	PPP
2011–12	Kentucky	40	40	32.0	.623	.150	.709	10.4	1.3	1.3	4.7	14.2
Total		40	40	32.0	.623	.150	.709	10.4	1.3	1.3	4.7	14.2

NBA

Davis en 2014.

Tal e como previron moitos Mock Drafts, Davis foi seleccionado na primeira posición do Draft da NBA de 2012 por New Orleans Hornets. Na súa estrea como profesional anotou 21 puntos e capturou 7 rebotes, mais non puido evitar a derrota do seu equipo en casa ante os San Antonio Spurs. Ao partido seguinte sufriu unha conmoción cerebral tras un choque co seu compañeiro Austin Rivers, o que lle mantivo afastado das pistas unha semana. Ao seu regreso asinou o seu primeiro dobre-dobre na NBA con 23 puntos e 11 rebotes, ademais de pór 5 tapóns. Participou no Rising Stars Challenge co Team Chuck, saíndo de titular e anotando 11 puntos e atrapando 9 rebotes. Davis finalizou a súa primeira tempada na NBA liderando a clasificación de rookies en rebotes (8'2) e tapóns (1'8). Foi incluído no mellor quinteto de rookies, mais a pesar de partir como favorito a principios da tempada, o premio ao Rookie do Ano levoullo Damian Lillard de forma unánime.

Na tempada 2013−14, Davis converteuse no xogador máis novo da historia da NBA en facer unha media de 20 puntos, 10 rebotes e 2'8 tapóns por partido. Quedou na terceira posición do trofeo ao Xogador máis mellorado da NBA tras Goran Dragić e Lance Stephenson. Ademais, foi elixido por primeira vez para disputar o All-Star Game, que celebrou en Nova Orleáns. Nun principio non foi votado polo público nin seleccionado posteriormente polos adestradores, mais a ausencia de Kobe Bryant por lesión permitiu a Davis estrearse no partido das estrelas diante do seu público. Tamén participou no Rising Stars Challenge en calidade de sophomore. A súa gran tempada non tivo premio a nivel colectivo, xa que os Pelicans, cun balance de 34 vitorias e 48 de derrotas, non se clasificaron para Playoffs.

A tempada 2014−15 foi a da súa definitiva consagración na elite da liga. Durante os primeiros meses de competición as súas espectaculares actuacións metéronlle de cheo na carreira polo MVP, que finalmente levou Stephen Curry. Ademais, foi incluído no Mellor quinteto da tempada e conseguiu clasificarse para os Playoff por primeira vez na súa carreira. O 9 de xullo de 2015 renovou o seu contrato por cinco anos e 145 millóns de dólares.

Estatísticas

Lenda
PX	Partidos xogados	PT	Partidos titular	MPP	Minutos por partido	%TC	Porcentaxe de tiros de campo
%3P	Porcentaxe de tiros de 3	%TL	Porcentaxe de tiros libres	RPP	Rebotes por partido	APP	Asistencias por partido
ROU	Roubos de balón por partido	TPP	Tapóns por partido	PPP	Puntos por partido	Negra	Máximo de carreira

Temporada regular

Ano	Equipo	PX	PT	MPP	%TC	%3P	%TL	RPP	APP	ROU	TPP	PPP
2012−13	New Orleans	64	60	28.8	.516	.000	.751	8.2	1.0	1.2	1.8	13.5
2013−14	New Orleans	67	66	35.2	.519	.222	.791	10.0	1.6	1.3	2.8	20.8
2014−15	New Orleans	68	68	36.1	.535	.083	.805	10.2	2.2	1.5	2.9	24.4
2015−16	New Orleans	61	61	35.5	.493	.324	.758	10.3	1.9	1.3	2.0	24.3
2016−17	New Orleans	75	75	36.1	.505	.299	.802	11.8	2.1	1.3	2.2	28.0
2017−18	New Orleans	75	75	36.4	.534	.340	.828	11.1	2.3	1.5	2.6	28.1
2018−19	New Orleans	56	56	33.0	.517	.331	.794	12.0	3.9	1.6	2.4	25.9
Total		466	461	34.6	.517	.314	.795	10.5	2.1	1.4	2.4	23.7
All-Star		5	2	15.6	.739	.167	.000	4.0	0.2	1.0	0.0	20.6

Playoffs

Ano	Equipo	PX	PT	MPP	%TC	%3P	%TL	RPP	APP	ROU	TPP	PPP
2015	New Orleans	4	4	43.0	.540	.000	.889	11.0	2.0	1.3	3.0	31.5
2018	New Orleans	9	9	39.8	.520	.273	.828	13.4	1.7	2.0	2.4	30.1
Total		13	13	40.8	.526	.250	.850	12.7	1.8	1.8	2.6	30.5

Internacional

Tras gañar o campionato universitario, e ante as lesións de varios xogadores importantes da selección estadounidense, Davis foi engadido xunto con James Harden á preselección do combinado norteamericano para os Xogos Olímpicos de Londres 2012. Máis tarde, unha lesión no nocello fixo que fose descartado da lista olímpica, mais tras a ausencia de última hora de Blake Griffin foi convocado de novo. Davis debutou nos Xogos Olímpicos ante Francia na vitoria do Team USA por 98-71, anotando tres puntos no oito minutos que estivo sobre o parqué. Finalmente conseguiría, xunto co resto dos seus compañeiros, a medalla de ouro de campión. Dous anos despois foi convocado de novo, esta vez para o Campionato do Mundo de Baloncesto de 2014 celebrado en España. Ao igual que na anterior cita o equipo de Davis conseguiu a medella de ouro.

Véxase tamén

Ligazóns externas

• Perfil en NBA.com (en inglés)