Ángel Urzaiz

Avogado, xornalista e político español (1856-1926)
(Redirección desde «Ángel Urzáiz»)

Ángel Urzaiz Cuesta, nado en El Puerto de Santa María (provincia de Cádiz) o 21 de febreiro de 1856 e finado en Madrid o 1 de maio de 1926, foi un avogado, xornalista e político español, foi ministro de Facenda durante a rexencia de María Cristina de Habsburgo-Lorena e durante o reinado de Afonso XIII.

Ángel Urzaiz
Nome completoÁngel Urzáiz y Cuesta
Nacemento21 de febreiro de 1856
Lugar de nacementoEl Puerto de Santa María
Falecemento1 de maio de 1926
Lugar de falecementoMadrid
NacionalidadeEspaña
Alma máterUniversidade Central
Ocupaciónpolítico, avogado e xornalista
FillosJoaquín Urzáiz Cadaval
Na rede
Galiciana: 128899
editar datos en Wikidata ]

Traxectoria editar

Fillo de Antonio Urzaiz Castro, brigadier da Armada e secretario do Rei e Mª Dolores de la Cuesta y Nuñez.

Licenciado en Dereito pola Universidade Central de Madrid, colaboraba como xornalista en El Correo, Los Debates e a Revista de España. Inicia a súa carreira política como deputado por Vigo nas eleccións de 1881. Nas eleccións de 1884 non logra o escano por Vigo, pero en 1886 resulta elixido polo distrito de Lalín nunha elección parcial pola renuncia como deputado de Antonio Aguilar Correa, volvendo ser elixido por Lalín en 1888. A partir de 1893 volveu ser deputado polo distrito de Vigo en todas as eleccións celebradas ata 1920. En 1922 accedeu ao Senado como senador vitalicio.

 
Pazo Cadaval, Nigrán.

Casou en maio de 1883 con Adela Cadaval Muñoz, señora do pazo de Cadaval de Nigrán, coa que tivo dous fillos: Elodia e Joaquín Urzaiz Cadaval.

Foi Subsecretario de Gobernación en 1887, Gobernador civil de Córdoba e Intendente en Cuba ata a perda da colonia en 1898, logo do seu regreso a España foi ministro de Facenda entre o 6 de marzo de 1901 e o 19 de marzo de 1902 nun gabinete Sagasta. Posteriormente, entre o 23 de xuño e o 18 de xullo de 1905, asumiu novamente a carteira de Facenda nun goberno que presidiu Eugenio Montero Ríos véndose obrigado a dimitir pola concesión duns créditos destinados a paliar a crise económica de Andalucía. Finalmente volveu dirixir o Ministerio de Facenda entre o 9 de decembro de 1915 e o 25 de febreiro de 1916 nun gabinete Romanones.

En 1908 fundou o xornal liberal La Voz de Vigo.

Rueiro co seu nome editar

Ángel Urzaiz conta cunha céntrica rúa viguesa co seu nome, un dos eixes da cidade. Tamén, cunha praza en Gondomar e con outra rúa en El Puerto de Santa María. Á rúa viguesa déuselle ese nome a finais do século XIX, aínda que entre 1937 e 1979 mudou o nome para rúa de José Antonio.

Véxase tamén editar

Bibliografía editar

Ligazóns externas editar


Predecesor:
Manuel Allendesalazar Muñoz
Antonio García Alix
Gabino Bugallal
 Ministro de Facenda 
1901 - 1902
1905
1915 - 1916
Sucesor:
Tirso Rodrigáñez y Sagasta
José Echegaray
Miguel Villanueva Gómez