Área sanitaria de Santiago de Compostela e A Barbanza

A área sanitaria de Santiago de Compostela e A Barbanza é unha das sete áreas sanitarias en que se divide o sistema público de saúde galego. Divídese en dous distritos sanitarios: a meirande parte do territorio ocúpao o Distrito sanitario de Santiago de Compostela, salvo no suroeste da área, onde se atopa o Distrito sanitario da Barbanza. É a única área sanitaria de Galicia que se estende por concellos de distintas provincias, a da Coruña e a de Pontevedra.

Mapa da área sanitaria de Santiago de Compostela e A Barbanza.

O Distrito sanitario de Santiago de Compostela abrangue os seguintes concellos: Ames, Arzúa, A Baña, Boimorto, Boqueixón, Brión, Carnota, Dodro, Dozón, A Estrada, Frades, Agolada, Lalín, Mazaricos, Melide, Mesía, Muros, Negreira, Noia, Ordes, Oroso, Outes, Padrón, O Pino, Pontecesures, Rianxo, Rois, Rodeiro, Santa Comba, Santiago de Compostela, Santiso, Silleda, Teo, Toques, Tordoia, Touro, Trazo, Val do Dubra, Valga, Vedra e Vila de Cruces. Pola súa banda, o Distrito sanitario da Barbanza esténdese polos concellos de Boiro, Lousame, Porto do Son, A Pobra do Caramiñal e Ribeira.

Os hospitais do Distrito sanitario de Santiago de Compostela están integrados no Complexo Hospitalario Universitario de Santiago, que ofrece atención sanitaria a unha poboación de 379.717 cidadáns con tarxeta sanitaria. O Distrito sanitario da Barbanza conta pola súa banda co Hospital Público da Barbanza, que da servizo aos 62.957 cidadáns con tarxeta sanitaria do distrito.