A pintura completaba a decoración das igrexas románicas. Como a escultura, estaba subordinada á arquitectura. A pintura románica defínese pola expresividade e a frontalidade das figuras representadas, o gusto polo simbolismo e o uso de cores intensas e planos aplicados mediante trazos grosos e simples. As técnicas usadas foron a pintura ao fresco e a pintura sobre táboa (nos retablos).
O Panteón dos Reis, na colexiata de San Isidoro de León (século XII), alberga unha serie de frescos considerados dos mellores exemplos do Románico castelán. Nunha das bóvedas podemos observar un Cristo en maxestade rodeado do tetramorfo, símbolo dos catro evanxelistas. O anxo representa a Mateo; o león, a Marcos; o boi, a Lucas; e a aguia, a Xoán.
