British and Irish Lions: Diferenzas entre revisións

Os '''''British and Irish Lions''''' (en [[lingua galega|galego]] '''Leóns británicos e irlandeses''') son unha selección dos mellores xogadores de [[rugby]] das [[Illas Británicas]] que cada catro anos fai unha xira por unha das rexións máis potentes do rugby do [[Hemisferio Sur]], principalmente [[Nova Zelandia]], [[Suráfrica]] e [[Australia]], malia que tamén teñen visitado [[Arxentina]]. Nesas xiras adoitan enfrontarse a varios equipos locais, para rematar cunha serie de tres ou catro encontros coa selección nacional do país visitado, que determinan quen sae gañador da xira, ó marxe dos resultados previos. Os ''Lions'' non son unha selección nacional, de xeito que tampouco poden competir oficialmente en ningún campionato, e os resultados contra eles non suman nin restan puntos na clasificación mundial. Porén, as xiras dos ''Lions'' son un evento mediático de primeiro nivel no rugby internacional, e a súa camisola vermella é a segunda máis vendida no mundo trala negra dos ''[[All Blacks]]''. Xogar cos ''Lions'' está considerada a máxima honra para un xogador de rugby das Illas Británicas, mesmo por enriba de xogar para o seu equipo nacional, pois os ''Lions'' son unha selección de seleccións ([[Selección de rugby de Escocia|Escocia]], [[Selección de rugby de Gales|Gales]], [[Selección de rugby de Inglaterra|Inglaterra]] e [[Selección de rugby de Irlanda|Irlanda]]). Do mesmo xeito xogar contra os ''Lions'' é moi valorado, pois adoitan visitar ós seus rivais tan só unha vez cada doce anos.