Coral Polifónica de Ribadeo: Diferenzas entre revisións

A Coral Polifónica de Ribadeo foi fundada en 1955, o que a converte na decana da provincia de Lugo.

Desde o mesmo día da súa presentación estivo dirixida por D.Carlos Álvarez Fernández-Cid, ata 1984, ano do seu falecemento. A partir desa data a dirección atópase baixo a batuta de María del Carmen Rodríguez Cancelo, mestra e profesora de música, titulada polo Real Conservatorio de Música de Madrid.

A Coral conta cun amplo repertorio no que se inclúen obras clásicas, relixiosas e populares, tanto españolas como doutros países, especialmente iberoamericanos. Na actualidade conta cunhas 55 voces mixtas que reflicten, polas suás idades, a tradición, o presente e o futuro.

A Polifónica de Ribadeo apadriñou ás corais de Viveiro, Sober e á Coral de la Asociación de Amigos del Camino de Santiago, de Lugo, nos seus concertos de presentación.

Realizou actuacións en numerosas vilas e cidades de Galicia e Asturias, e tamén en Astorga, San Sebastián, Barcelona, Sabadell, Jaén, Marbella, Laredo, Los Corrales de Buelna, Madrid, Valladolid, Logroño, León, Boadilla del Monte, Medina del Campo, e en Portugal(Lisboa, Santa María da Feira e Águeda).

En decembro de 2002 presentou o seu CD, titulado "Nos mares da música".

En diversas ocasións actuou conxuntamente con agrupacións instrumentais da vila: Banda Municipal, Grupo de Gaitas, Rondalla, Grupos de Percusión, de Música de Cámara, de rock, así como coa Orquesta de Acordeones de La Caridad(Asturias), Orquestra Sinfónica de Xove, Orquestra de Corda do Conservatorio de Lugo e co grupo vasco Tirri Tarra, co que interpretou a cantata Luz Negra.

Colabora habitualmente coa Coral a pianista Carmen Álvarez Lebredo.

O Concello concedeulle a "Medalla de Ouro de Ribadeo", no ano 2006, con motivo do seu 50º aniversario. Ademais, a Asociación de Radio e Televisión de Lugo outorgoulle o premio "Lucense do ano, 2006".

A Coral Polifónica de Ribadeo, uns humildes intermediarios entre o compositor e o público, dá vida, dentro da súa faceta de aficcionados, á linguaxe musical, co orgullo de saberse posuidora do máis fermoso, expresivo e cercano instrumento musical da natureza: a voz.