Escudo do Bierzo
O escudo do Bierzo foi aprobado nunha sesión do Consello Comarcal do Bierzo (León) celebrada o 14 de abril do ano 2000, como elemento integrado na bandeira desta comarca.
| Escudo do Bierzo | |
|---|---|
 | |
| Detalles | |
| Armiger | Consello Comarcal |
| Adoptado | 14 de abril do ano 2000 |
| Crista | Coroa real |
| Escudo | De goles, unha cruz grega de ouro, cun alfa e un omega do mesmo pendentes do seu traveseiro, que é a Cruz de Peñalba; bordadura composta de oito cadrados, de prata cargados dunha folla de vide de sinople, e de azur cargados de dous martelos de ouro postos en sautor |
Heráldica editar
Posúe a seguinte descrición heráldica ou brasón:
"De goles, unha cruz grega de ouro, cun alfa e un omega do mesmo pendentes do seu traveseiro, que é a Cruz de Peñalba; bordadura composta de oito cadrados, de prata cargados dunha folla de vide de sinople, e de azur cargados de dous martelos de ouro postos en sautor. Ao timbre, coroa real, forrada de goles, cerrada, que é un círculo de ouro, engastallado de pedras preciosas, composto de oito floróns de follas de acanto, visibles cinco, interpoladas de pérolas e de cada unha das súas follas saen cinco diademas sumados de pérolas que converxen nun orbe azur, co semimeridiano e o ecuador de ouro, sumado de cruz de ouro".
O elemento máis importante do escudo é a Cruz de Peñalba, símbolo do Bierzo, representada de ouro (amarelo ou dourado heráldico) nun campo de goles (fondo vermello). Enmarcando o campo de goles figura unha bordadura composta. As bordaduras son as pezas honorables que rodean o interior dos escudos por todos os seus lados. Os cadrados que a campoñen teñen os esmaltes alternados e cobren o fondo de calquera peza ou moble dun brasón. O bordo do escudo do Bierzo conta con oito compoñentes: catro de prata (cor branca ou gris), nos cales figura unha folla de vide de sinople (cor verde) como símbolo da agricultura berciana, e catro de azur (cor azul), con dous martelos postos en sautor (colocados en forma de aspa) representando a minaría.
No timbre do escudo aparece representada a coroa real de España, cerrada con oito diademas, cinco á vista.
O escudo aparece situado no centro da bandeira do Bierzo. O deseño do escudo, como o da bandeira, foi obxecto de polémicas arredor do deseño e o custo. Presentouse unha variante como alternativa que contaba con dúas vieiras en cadrados centrais dos laterais, simbolizando o percorrido do Camiño de Santiago que cruza o Bierzo de leste a oeste. Esta alternativa tamén presentaba pequenas diferenzas na cor e a coroa.[1]