Empresa Ribadeo S.A.

Empresa Ribadeo S.A. (ERSA) foi unha empresa de transporte colectivo de viaxeiros por estrada en autocar da localidade lucense de Ribadeo.

Empresa Ribadeo S.A.
País	España
[ editar datos en Wikidata ]

Historia

Constituíuse o 8 de febreiro de 1930 co nome de Empresa Ribadeo de Transportes Mecánicos Rodados S.L., froito da asociación de tres familias con tradición transportista. O 9 de maio de 1957 mudou a forma xurídica á de sociedade anónima.

Durante décadas foi explotadora de boa parte das liñas regulares no norte de Galicia, e pertenceu a accionistas tan significativos no sector do transporte como Raúl López López, Gonzalo Álvarez Arrojo ou as familias Nistal, Freire e Pita.

Nos últimos anos de existencia pertenceu, xunto con Empresa El Celta S.A. (de similar tamaño, capital e anos de experiencia no sector-dende 1954-) á coruñesa Ideal Auto S.A. (IASA). Tras unha progresiva redecoración dos autocares de ámbalas dúas empresas, anunciouse a súa extinción por absorción o 28 de decembro de 1998 nas xuntas xerais da absorbente IASA, que á súa vez foi mercada pola multinacional británica Arriva.

Véxase tamén

Bibliografía

• Gómez Vázquez, Moisés; Luis A. Sampedro Vega, Jose M. Vázquez Rico, Alfredo Freire Leiras e Paulo Naseiro Ramudo (2010). "O Ideal Auto" Material Gráfico e Anotacións Históricas (1ª ed.). Ribadeo. p. 172. ISBN 978-84-614-6364-0.