Emily Brontë

Emily Brontë, nada en Thornton (West Yorkshire) o 30 de xullo de 1818 e finada en Haworth (Yorkshire) o 19 de decembro de 1848, foi unha escritora inglesa. A súa obra máis importante foi a novela Wuthering Heights (Curutos treboentos), publicada en 1847 e considerada un clásico da literatura inglesa.

Emily Brontë
Alcume	Ellis Bell
Nacemento	30 de xullo de 1818, 1818 e 30 de xullo de 1818
Lugar de nacemento	Thornton, West Yorkshire e The Brontë Birthplace
Falecemento	19 de decembro de 1848, 1848 e 19 de decembro de 1848
Lugar de falecemento	Haworth
Causa	tuberculose
Soterrada	St Michael and All Angels' Church, Haworth
Nacionalidade	Reino Unido de Gran Bretaña e Irlanda
Etnia	Pobo inglés
Relixión	Igrexa Anglicana
Alma máter	Cowan Bridge School e Pensionnat de Demoiselles
Ocupación	poeta, novelista, escritora, mestra e institutriz
Pai	Patrick Brontë
Nai	Maria Branwell
Irmáns	Patrick Branwell Brontë, Charlotte Brontë, Anne Brontë, Elizabeth Brontë e Maria Brontë
Coñecida por	Curutos treboentos e Poems by Currer, Ellis, and Acton Bell
Na rede
[ editar datos en Wikidata ]

Retrato pintado polo seu irmán Branwell

Traxectoria

Emily foi a quinta de seis irmáns (un rapaz e cinco mulleres, entre elas Charlotte e Anne). En 1820 a familia trasladouse a Haworth, onde o seu pai foi nomeado párroco da Igrexa anglicana. A súa nai morreu o 21 de setembro de 1821, e en agosto de 1824 Charlotte e Emily foron enviadas canda as súas irmás máis vellas, Mary e Elizabeth, ao colexio de Clergy Daughters, en Cowan Bridge (Lancashire), onde caeron enfermas de tuberculose. Mary e Elizabeth volveron enfermas a Haworth e morreron en 1825, polo cal a familia sacou a Charlotte e Emily do internado. Neste colexio inspirouse Charlotte Brontë para describir o sinistro centro Lowood que aparece na novela Jane Eyre.

En 1838 Emily comezou a traballar como gobernanta en Law Hill, preto de Halifax. Máis tarde, de novo canda á súa irmá Charlotte, foi a un colexio privado en Bruxelas, até que regresou a Inglaterra trala morte da súa tía. Emily quedou a partir de entón como administradora da casa familiar.

En 1846 Charlotte descubriu por casualidade as poesías que escribía a súa irmá Emily. Xunto a Anne, as tres irmás Brontë decidiron publicar un libro de poesía conxunto. Para evitar os prexuízos sobre as mulleres escritoras, as tres utilizaron pseudónimos masculinos (Currer, Ellis e Acton Bell). As poesías de Emily son as de máis calidade. As de Anne, aínda que non de tan alto nivel, son tamén superiores ás de Charlotte, cuxo talento era esencialmente novelesco. Vendéronse só dous exemplares do libro, que pasou inadvertido; porén, as irmás non se desanimaron e decidiron escribir unha novela cada unha.

En 1846 publicouse Wuthering Heights, un clásico da literatura inglesa a pesar de que inicialmente, debido á súa innovadora estrutura, desconcertou á crítica. A obra foi levada varias veces ao cine, se ben a adaptación máis valorada é a dirixida en 1939 por William Wyler, con Laurence Olivier, Merle Oberon e David Niven como actores principais. En 1953 Luis Buñuel fixo unha adaptación máis fiel.

Emily, de saúde fraxil, morreu de tuberculose logo de coller un arresfriado en setembro no funeral do seu irmán. Foi soterrada na igrexa de San Miguel de Todos os Santos en Haworth.

Véxase tamén

Outros artigos

• Familia Brontë

Ligazóns externas

• As obras de Emily Brontë no Proxecto Gutenberg (en inglés)

---

Este artigo sobre literatura é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---