Efecto Streisand
O efecto Streisand é un fenómeno de Internet no que unha tentativa de censura ou agocho de certa información fracasa ou é ata contraproducente para o censor, posto que esta acaba sendo amplamente divulgada, recibindo maior publicidade da que tería se non se pretendese agochar.
Normalmente, estes intentos de censura diríxense cara a fotos, ficheiros ou páxinas web, especialmente mediante cartas que ameazan con emprender accións legais por parte do censor. Lonxe de ser eliminada, a dita información recibe moita publicidade, e acaba sendo rapidamente distribuída a través de blogs, sitios de novas ou sistemas P2P.
Este efecto ocorre, segundo o experto en Internet John Gilmore, porque a rede interpreta a censura coma un dano ou ataque cara a ela.
Orixe editar
O termo ten a súa orixe nun incidente ocorrido en 2003 cando a actriz Barbra Streisand denunciou por 50 millóns de dólares ao fotógrafo Kenneth Adelman e á páxina pictopia.com por unhas fotografías aéreas da costa de California na que se vía a súa casa, esixindo que se retirase a foto xa que violaba a súa privacidade. A polémica co tempo fixo que a foto se fixese coñecida e o caso moi comentado.
Casos editar
En 2013 a estación de radio militar de Pierre-sur-Haute atraeu o interese dos medios despois de coñecerse que a Dirección Central da Información Interior (máis coñecida polas súas siglas en francés DCRI, Direction Centrale du Renseignement Intérieur), a axencia de intelixencia francesa, tentou suprimir o artigo da Wikipedia en francés que falaba sobre o complexo.
Efecto Streisand en Galiza editar
En 2010 o Conselleiro de Cultura, Roberto Varela, en FITUR referiuse ao concello de Sobrado como Desván de los Monjes. O feito foi comentado pola prensa e negado polo conselleiro o que xunto co vídeo lle deu gran sona.[1][2][3][4]
En marzo de 2013 a CRTVG ameazou a unha páxina web de seareiros do Xabarín Club de emprender accións legais se esta non pechaba en sete días. A CRTVG alegaba uso ilícito das súas marcas rexistradas "Xabarín Club", "Xeración Xabarín" e "Xabarín News".[5] A información do peche da páxina web chegou a diversas redes sociais e medios de comunicación de ámbito galego.[6]
En febreiro de 2018 o libro Fariña, do xornalista coruñés Nacho Carretero, multiplicou as súas vendas despois de que o xulgado de Instrución número 7 de Collado Villalba (Madrid) ordenase o seu secuestro o estimar a denuncia realizada por Alfredo Bea Gondar, que foi alcalde do Grove nos anos 80.[7]
Notas editar
- ↑ Vídeo en YouTube
- ↑ Henrique Mariño (8 de marzo de 2010). "Varela, no es Desván de los Monjes sino Fayado de los Monjes". Público (en castelán).
- ↑ Xavier Gómez Guinovart (9 de abril de 2010). "Do "Niño de la Guía" ao "Desván de los Monjes"". Terra e Tempo. Arquivado dende o orixinal o 13 de abril de 2020. Consultado o 22 de outubro de 2019.
- ↑ Daniel Domínguez. "¿Conoce Desván de los Monjes?". Faro de Vigo (en castelán).
- ↑ "Pechan a páxina web non oficial da Xeración Xabarín" Código Cero.
- ↑ "Pecha unha web de fans do Xabarín Club por indicación da CRTVG" Praza Pública
- ↑ "'Fariña' sitúase como libro máis vendido en Amazon tras anunciarse o seu secuestro". 21/02/2018. Consultado o 21/02/2018.
Véxase tamén editar
Ligazóns externas editar
- Recompilación de casos nos que se dá este efecto Arquivado 15 de outubro de 2011 en Wayback Machine. (en inglés)