Dólar de prata da Estatua da Liberdade
| Dólar de prata da Estatua da Liberdade | |
|---|---|
 | |
| A/: Estatua da Liberdade con edificio ao fondo. Data e marcas de ceca e de Ensaiador (JM).
Lendas: LIBERTY / ELLIS ISLAND GATEWAY TO AMERICA / IN GOD WE TRUST |
R/: Man da estatua sostendo o facho aceso, cun fragmento dun poema aos lados. Marcas de gravador (MP e JM).
Lenda: UNITED STATES OF AMERICA / E PLURIBUS UNUM / ONE DOLLAR |
| |
O dólar de prata da Estatua da Liberdade é unha moeda conmemorativa, non circulante, emitida pola Casa da Moeda dos Estados Unidos en 1986 e cuñada polas Casas da Moeda de San Francisco e de Filadelfia.
Esta moeda dun dólar foi autorizada pola Lei 99-61, do 9 de xullo de 1985,[1] pola que se dispuxo a emisión dunha serie de moedas en conmemoración do centenario da Estatua da Liberdade na illa Ellis.[2]
Xunto coa moeda dun dólar de prata, as moedas que completan a serie conmemorativa ao abeiro da mesma lei son a de cinco dólares de ouro e a de medio dólar, de cobre revestido con níquel.[1][3]
Deseño editar
No anverso da moeda, deseñado e gravado polo gravador da US Mint John M. Mercanti, represéntase unha vista da Estatua da Liberdade cun dos edificios da illa Ellis ao fondo. A lenda alusiva ao motivo conmemorado é ELLIS ISLAND GATEWAY TO AMERICA ("Illa Ellis porta de América), e vai acompañada polos lemas IN GOD WE TRUST ("En Deus confiamos") e LIBERTY ("Liberdade"), tradicionais das moedas estadounidenses, ademais da data de emisión.[2][4]
Pola súa banda, o reverso, obra de John Mercanti e de Matthew Peloso, está caracterizado polo deseño da man dereita da estatua collendo o facho aceso, irradiando uns raios estilizados e rodeada por un fragmento do poema The New Colossus, da poeta estadounidense Emma Lazarus: GIVE ME YOUR TIRED, YOUR POOR, YOUR HUDDLED MASSES YEARNING TO BREATH FREE ("Dádeme as multitudes cansas, pobres e amontoadas, que devecen por ser libres").[5] Este motivo do reverso está rodeado por lendas alusivas ao nome do país e ao valor facial da moeda, así como o lema E PLURIBUS UNUM.[2][4]
Produción e comercialización editar
A lei que autorizou a emisión destas moedas conmemorativas prevía unha tiraxe máxina de dez millóns de exemplares.[1] A moeda produciuse na Casa da Moeda de Filadelfia na súa versión estándar, en tanto que a Casa da Moeda de San Francisco se encargou da cuñaxe das moedas con acabamento especial (proof). A produción comezou o 18 de outubro de 1985 e estendeuse durante todo o ano 1986.[2][4]
A súa produción foi de 723.635 moedas na súa condición estándar e 6.414.638 en versión proof, o que fai un total de 7.138.273 exemplares.[3][4]
A moeda comercializouse aos prezos de 22 dólares en condición estándar e 24 en versión proof.[4] Consonte a lei que autorizou a moeda, o beneficio acadado coa súa venda destinouse á Statue of Liberty - Ellis Island Foundation, para o financiamento da restauración e do mantemento da Estatua da Liberdade e das instalacións utilizadas para a inmigración na illa Ellis.[2]
Notas editar
- ↑ 1,0 1,1 1,2 "Public Law 99-61 - JULY 9, 1985". Govinfo.gov
- ↑ 2,0 2,1 2,2 2,3 2,4 "Statue of Liberty Dollar". United States Mint.
- ↑ 3,0 3,1 "Historical Commemorative Coin Sales Figures: 1986 U.S. Statue of Liberty". United States Mint.
- ↑ 4,0 4,1 4,2 4,3 4,4 "1 Dollar Statue of Liberty". Numista.com
- ↑ "Emma Lazarus: “The New Colossus”". PoetryFoundation.org
Véxase tamén editar
Outros artigos editar
Ligazóns externas editar
- "1986 Statue of Liberty Silver Dollar" (ModernCommemoratives.com)