Crebinsky

Crebinsky é un filme galego de ficción dirixido por Enrique Otero e estreado en abril de 2011.

Crebinsky
Ficha técnica
Título orixinal	Crebinsky
Director	Enrique Otero
Produtor	Farruco Castromán Miguel de Lira Enrique Otero
Guión	Miguel de Lira Enrique Otero
Intérpretes	Miguel de Lira Sergio Zearreta Luís Tosar Celso Bugallo
Música	Pablo Pérez
Fotografía	Sergio Franco
Montaxe	J. R. Lorenzo Enrique Otero
Estudio	ZircoZine Control Z Chévere Visión
Estrea	8 de abril de 2011
Duración	90 minutos
Orixe	Galicia
Xénero	Comedia, realismo máxico, road movie
Orzamento	1 365 455 €
Recadación	48.198,90 €

Argumento

A historia está ambientada na costa galega en xuño de 1944, no contexto da Segunda Guerra Mundial. Feodor e Mijail Crebinsky son dous irmáns, fillos de María Cribeiro e Vladimir Crebinsky, un piloto ruso que sofrera un accidente aéreo anos antes. Noutro accidente os nenos quedan orfos, e logo dunhas choivas torrenciais o río crece e asolaga a aldea na que viven. Levados pola corrente, os irmáns e a súa vaca Mucha aparecen na costa. Fan unha cabana non lonxe dun faro, sobrevivindo grazas ás crebas, os obxectos que deixa o mar. Os irmáns Crebinsky criáronse sós dende novos, polo que teñen unha particular relación (comunícanse cun frases simples e directas) e un peculiar modo de existencia (ao descoñeceren o uso real dos obxectos que atopan, recíclanos segundo mellor lles conveña en cada momento cun grande enxeño artesanal).

Sen sabelo, vense implicados no conflito bélico. Un piloto alemán da Luftwaffe ten un accidente na praia, e un submarino estadounidense decide desembarcar alí. Soldados alemáns que traballan preto de alí, nunha mina de volframio, van xunto cun falanxista na procura do piloto accidentado, pois levaba un radiotransmisor. Os irmáns comezan unha viaxe pola zona na procura da súa vaca, e chegan a unha verbena na que actúa un grupo musical. Finalmente atopan a vaca, xunto á tumba dos seus pais. Nese momento a vaca morre, e os irmáns regresan á aldea natal.

Personaxes

• Miguel de Lira como Feodor Crebinsky
• Sergio Zearreta como Mijail Crebinsky
• Luís Tosar como Comandante americano
• Celso Bugallo como fareiro
• Yolanda Muíños como María Cribeiro
• Farruco Castromán como falanxista
• Oliver Schultz como Xeneral nazi
• Patricia de Lorenzo Loli
• Iván Marcos como soldado americano
• Jorge Taboada como Feodor Crebinsky de neno
• Antía Baget como Loli de nena
• Óscar Pombo como Mijail Crebinsky de neno
• Manuel Cortés como socio de Loli
• Oliver Bigalke como técnico de comunicacións alemán
• Roberto Sánchez como Vladimir Crebinsky
• Pepe Soto como construtor da avioneta
• Danny Raatzke como Kowalsky, soldado alemán

Rodaxe

Foi rodada entre o 15 de setembro e o 30 de outubro de 2008 en Espasante (Ortigueira), Portomarín, Mañón, e Santiago de Compostela.

Banda sonora

A música do filme foi composta por Pablo Pérez. A banda sonora inclúe dous boleros interpretados por Patricia de Lorenzo. A música foi levada ao directo pola banda Universo Crebinsky, formada por Vadim Yukhnevich (voz e acordeón), Pablo Pérez (contrabaixo), Fernando Abreu (clarinete), Carlos Castro (vibráfono e percusión), Xacobe Lamas (violín), Miguel Queixas (batería), Pablo Rega (guitarra) e Enrique Otero (teclados).

Galardóns e nomeamentos

No Festival de Cine Español de Málaga de 2011 recibiu dous premios: mellor guión novel e o premio Signis. Foi seleccionada no Festival Internacional de Pusan (PIFF) de 2010, en Corea do Sur.

Recibiu o Premio Agave 2011 á mellor película na segunda edición do FilmFest de Oaxaca de Juárez.

Premios Mestre Mateo

Nos premios Mestre Mateo 2010, Crebinsky tiña 12 candidaturas, levando finalmente catro galardóns: actor protagonista (Miguel de Lira), dirección artística (Ángel Amaro e Nanda Cuíña), dirección de fotografía (Sergio Franco) e maquillaxe e peiteado (Susana Veira).

Ano	Categoría	Receptor	Resultado
9ª edición	Mellor filme	Enrique Otero	Nomeado
	Mellor director	Enrique Otero	Nomeado
	Mellor actor	Miguel de Lira	Gañador
	Mellor guión	Miguel de Lira e Enrique Otero	Nomeados
	Mellor dirección de produción	Sergio Gil e Pilar Pérez Solano	Nomeados
	Mellor dirección artística	Ángel Amaro e Nanda Cuíña	Gañadores
	Mellor montaxe	J. R. Lorenzo e Enrique Otero	Nomeados
	Mellor música orixinal	Pablo Pérez	Nomeado
	Mellor son	Diego S. Staub e Xavier Souto	Nomeado
	Mellor fotografía	Sergio Franco	Gañador
	Mellor maquillaxe e peiteado	Susana Veira	Gañadora
	Mellor deseño de vestiario	Carlos Alonso e Eva Camino	Nomeados

Véxase tamén

Outros artigos

• Lista de filmes en galego con maior recadación

Ligazóns externas

• Crebinsky na IMDb (en inglés).
• Ficha en Cultura Galega.org