Club Deportivo Arenteiro
O Club Deportivo Arenteiro é un club de fútbol do Carballiño fundado no 1958, que milita actualmente na Primeira División RFEF. O seu campo é o Estadio de Espiñedo, con céspede natural e capacidade para 2.000 persoas. Tamén utiliza para os adestramentos o Campo da Uceira situado no barrio carballiñés da Uceira. Alí disputan os seus partidos as categorías inferiores do equipo carballiñés (EMF Arenteiro) e o Sporting Carballiño, que figura na Primeira de Galicia (grupo 4º).
| Arenteiro | |||
|---|---|---|---|
| Nome | Club Deportivo Arenteiro | ||
| Fundación | 1958 | ||
| Estadio | Espiñedo, O Carballiño, Galicia | ||
| Capacidade | 2000 | ||
| Presidente |  Argimiro Marnotes | ||
| Adestrador | Javi Rey | ||
| Liga | 1ª RFEF – Grupo 1 | ||
| 2022–23 | 1º | ||
| Vestimenta | Coolsport | ||
| Patrocinador | Cer&Ber, GRI Towers, Solgaleo, Abanca. | ||
| Na rede | |||
| http://www.cdarenteiro.es/ | |||
| |||
No 1990 pasou a chamarse Club Deportivo O Carballiño, pero no 2005 recuperou a denominación tradicional. Recibe o nome do río Arenteiro, río que atravesa a vila do Carballiño.
Historia editar
Fundado en 1958, o Arenteiro debutou en Terceira División na tempada 1964/65 e mantívose tres anos consecutivos na categoría, volvendo descender en 1967. Non foi ata 1980 cando conseguiu de novo o ascenso a Terceira.
Na tempada 1986/87 proclamouse subcampión do grupo I da Terceira División, por detrás do Endesa As Pontes. Grazas á ampliación da Segunda División B de 1 a 4 grupos a tempada seguinte, o Arenteiro conseguiu o ascenso directo de categoría. Na tempada 1987/88 debutou e logrou a permanencia en Segunda B, da man do adestrador Agapito Viñas, cun equpo no que xogaban entre outros Pereira, Sobrino, Carlos Lago ou Quecho.[1] Na campaña seguinte descendeu novamente a Terceira.
Tralo descenso de categoría, o equipo mantívose un par de anos na metade da táboa ata que na 1991/92 acabou na terceira posición. Na liguiña de ascenso a Segunda B acabou terceiro, por detrás do RSD Alcalá e o CD Lealtad, e por diante do Atlético Astorga, sen poder ascender. Volveu repetir a terceira posición na liga ao ano seguinte, no que tampouco conseguiu o ascenso, quedando último na liguiña tralo Real Madrid C, o Zamora CF e o Club Siero. Na campaña seguinte descendeu a Preferente.
Tralo descenso, o equipo pasou máis de dúas décadas entre a Preferente (a mayoría de tempadas) e a Primeira Autonómica. Na 2016/17 acabou a liga en Preferente na terceira posición e, grazas ao ascenso do Rápido de Bouzas a Segunda B, o Arenteiro ascendeu de novo á Terceira División despois de 23 anos de ausencia na categoría.
Na tempada 2020/21, conseguiu ascender á Segunda División RFEF, 34 anos despois da súa última tempada na antiga Segunda B. Además, proclamouse campión da categoría, ao vencer o Bergantiños, segundo clasificado. Na Copa do Rei 2021/22, a súa sétima participación no torneo, o equipo verde eliminou na primeira rolda a SD Logroñés, equipo dunha categoría superior (Primeira RFEF), ao que gañou 2-1 con goles de Renan Zanelli e Sylla.[2] Para a seguinte rolda o sorteo emparellou o club do Carballiño cun equipo de Primeira División: o Valencia. O equipo valencianista derrotou os carballiñeses 1-3 en Espiñedo, pero xa na prórroga logo do 1-1 ao remate do tempo oficial de partido.[3]
A tempada 2022/23 comezou con título, pois o Arenteiro derrotou o Compostela na final da fase autonómica da Copa RFEF (2-1), o que lle deu o pase á fase estatal.[4]
Datos do club editar
Historial na liga editar
|
|
|
|
Palmarés editar
- Segunda División RFEF (1): 2022/23.
- Terceira División (1): 2020/21.
- Copa Federación (1): 2022.
Notas editar
- ↑ Rodríguez, Luis M. (23 de febreiro de 2021). "El Arenteiro busca un ascenso que no celebra desde 1987". La Voz de Galicia (en castelán). Consultado o 2 de decembro de 2021.
- ↑ Rodríguez, Luis M. (2 de decembro de 2021). "O Arenteiro apea ao Logroñés e soña cun Primeira en Espiñedo". La Voz de Galicia. Consultado o 9 de decembro de 2021.
- ↑ "El Valencia sufre un tormento antes de tumbar a un inmenso Arenteiro". MARCA (en castelán). 2021-12-16. Consultado o 2022-08-29.
- ↑ "El Arenteiro ya levanta copas". La Región (en castelán). 2022-08-28. Consultado o 2022-08-29.
Véxase tamén editar
Ligazóns externas editar
- Páxina web oficialArquivado 27 de setembro de 2015 en Wayback Machine.
- Artigo sobre o equipo no blog Sena Fútbol Marín