Clasificación Decimal Universal

A Clasificación Decimal Universal ou CDU é un sistema de clasificación do coñecemento que nace da necesidade de ordenar e catalogar as obras nas bibliotecas.

Melvil Dewey, bibliotecario do Amherst College en Massachusetts, Estados Unidos, creou en 1876 o Sistema Dewey de clasificación. Este sistema foi adaptado por Paul Otlet e Henri A Fontaine e publicado por primeira vez en lingua francesa entre 1904 e 1907 co nome de Clasificación Decimal Universal. Desde entón foi continuamente revisado e desenvolvido e demostrou ser un sistema moi flexible e efectivo para clasificar e ordenar fondos bibliográficos. Baséase na ordenación do coñecemento a través de díxitos. A un grupo principal asígnaselle un díxito, do 0 ao 9, e a cada nivel que deba ser creado dentro do grupo engádeselle un novo díxito. Un exemplo de tres niveis é o seguinte:

3 - Ciencias sociais

34 - Dereito

341 - Dereito internacional.

Características e principios da CDU

Esta clasificación intenta dividir todo o coñecemento en dez grandes campos, os cales corresponderán ás táboas principais. Cada unha está constituída por un só número:

• 0 Xeneralidades. Ciencia e coñecemento. Organización. Información. Documentación. Enciclopedias. Biblioteconomía. Institucións. Documentos e publicacións
• 1 Filosofía. Psicoloxía
• 2 Relixión. Teoloxía
• 3 Ciencias sociais. Estatística. Política. Economía. Comercio. Dereito. Goberno. Asuntos militares. Benestar social. Seguros. Educación. Folclore
• 4 Vacante
• 5 Matemáticas. Ciencias naturais (inclúe auxiliares especiais e división principal)
• 6 Ciencias aplicadas. Medicina. Tecnoloxía
• 7 Belas artes. Xogos. Espectáculos. Deportes
• 8 Linguaxe. Lingüística. Literatura
• 9 Xeografía. Biografías. Historia

Cada táboa divídese á súa vez noutros dez grupos, e así sucesivamente sen límite; trátase dunha clasificación decimal. A notación estrutúrase utilizando números arábigos que non funcionan como números enteiros.