Casa da Moeda de Carson City
Coordenadas: 39°10′03″N 119°46′02″O / 39.16750, -119.76722
A Casa da Moeda de Carson City (en ninglés: Carson City Mint) foi unha fábrica de moeda estadounidense situada en Carson City, Nevada, que se constituíu como unha das ramas da Casa da Moeda dos Estados Unidos, para a cuñaxe de moedas de prata e de ouro.[1][2]
Casa da Moeda de Carson City –US Mint– | |
---|---|
Edificio da Casa da Moeda de Carson City | |
Tipo | Establecemento público de carácter industrial e comercial |
Fundación | 1838 |
Matriz | Casa da Moeda dos Estados Unidos |
Localización | Carson City Nevada Estados Unidos. |
Persoas clave | - Alfred B. Mullett (arquitecto). - Abraham Curry (1º director). |
Industria | Cuñaxe. |
Produtos | Moedas e medallas. |
Notas | |
Marca de ceca: CC. | |
[ editar datos en Wikidata ] |
O Congreso dos Estados Unidos instituíu a nova ceca de Carson City en 1863, aínda que non entrou en funcionamento ata 1870. Mantivo a súa operatividade ata 1893, cun período de inactividade entre 1885 e 1889. Na ceca de Carson City cuñáronse 50 modelos diferentes de moedas de prata e 57 de ouro, todas elas coas iniciais do topónimo, CC, a modo de marca de ceca.[1][2]
O Museo do Estado de Nevada (Nevada State Museum) ocupa agora o antigo edificio da Casa de Moeda de Carson City.[3]
Historia editar
Creación e funcionamento editar
A ceca de Carson City comezou a súa existencia nun momento de auxe da prata e estaba situada a pouca distancia das minas locais dese metal. A elección do lugar non foi casual; tratábase de facilitar a cuñaxe da prata extraída da coñecida como vea de Comstock (a primeira de prata atopada no país), do mesmo xeito que ocorrera coa Casa de Moeda de San Francisco, que se establecera unha década antes para a cuñaxe do ouro extraído en plena Febre do ouro de California.[1][2][4]
O edificio que aloxou a ceca foi o primeiro dos deseñados polo angloestadounidense Alfred B. Mullett (1834-1890) como arquitecto xefe da axencia do Departamento do Tesouro encargada da construción de edificios gobernamentais.[3] De feito, a Mullet débeselle tamén o deseño da Casa da Moeda de San Francisco. A supervisión das obras correu a cargo de Abraham Curry (1815-1873), coñecido como o "Pai de Carson City", que logo foi nomeado director da Casa da Moeda durante os seus primeiros anos de funcionamento.[1][2][5]
O edificio ten unha fachada de pedra sinxela de estilo neorenacentista, con fiestras redondeadas na parte superior e dispostas en pares, e cun pórtico central.[2][3]
Acabada en 1893 a actividade de cuñaxe, a Casa de Moeda deixou de existir como tal en 1895, por razóns de índole política e pola mingua da produción de prata na rexión. O seu derradeiro director foi James Crawford, quen tomara posesión do seu cargo en 1874.[2]
Entre 1895 e 1933 o establecemento reconverteuse en Oficina de Ensaio dos EEUU para o ouro e a prata e, finalmente, o Goberno federal vendeulle o edificio ao Estado de Nevada en 1939 por 10.000 dólares.[1][2][3]
Malia non retomarse nunca a cuñaxe nesta ceca, a súa prensa monetaria orixinal mantense aínda no edificio, e con ela cuñáronse en ocasións recente algunhas medallas, coa marca de ceca CC. Algunhas das últimas foron a conmemorativa do 75º aniversario do establecemento do Museo do Estado de Nevada, que agora ocupa as instalacións[6], ou a que celebra o 150º aniversario da constitución da Casa da Moeda, que amosa a imaxe do seu primeiro director, Abraham Curry, nos seus anversos.[7][8]
Proposta de cuñaxe de moedas conmemorativas editar
O 16 de xullo de 2019 propúxose un proxecto de lei para a cuñaxe de dólares Morgan e Peace en 2021 no edificio da antiga Casa da Moeda, cun límite de 500.000 pezas.[9] Se o proxecto chegar a efecto, estas moedas converteríanse nas primeiras de curso legar en amosar a marca de ceca CC desde hai 128 anos.[10]
Este proxecto de lei recibiu o apoio do sector do coleccionismo, focalizado principalmente na postura favorable da American Numismatic Association.[11]
Tipos de moedas cuñadas en Carson City editar
Valores en prata editar
- 10 centavos (dime) tipo "Liberdade sentada" (1871-1878).
- 20 céntimos (1875-1876).
- Cuarto dólar tipo "Liberdade sentada" (1870-1878).
- Medio dólar tipo "Liberdade sentada" (1870-1878).
- Dólar tipo "Liberdade sentada" (1870-1873).
- Dólar de comercio (1873-1885).
- Dólar Morgan (1878-1893).
Valores en ouro editar
- 5 dólares Liberty Head (1870-1884 e 1890-1893).
- 10 dólares Liberty Head (1870-1884 e 1890-1893).
- 20 dólares Liberty Head (1870-1885 e 1889-1893).
Notas editar
- ↑ 1,0 1,1 1,2 1,3 1,4 "Carson City US Coin Mint". USA Coin Book.
- ↑ 2,0 2,1 2,2 2,3 2,4 2,5 2,6 "The History of the Carson City Mint". United States Mint.
- ↑ 3,0 3,1 3,2 3,3 "Branch Mint, Carson City, Nevada". Archives.org
- ↑ "Wild West Frontier Days and the Carson City U. S. Mint Arquivado 26 de xullo de 2021 en Wayback Machine.". US-Mint.info
- ↑ "Abraham Curry Arquivado 14 de decembro de 2019 en Wayback Machine.". Online Nevada Encyclopedia. (ONE).
- ↑ "Nevada State Museum goes behind the scenes for 75th birthday". En Reno Gazette Journal. 28 de outubro de 2016.
- ↑ "Nevada State Museum will strike Curry Medaillon on Dec.28 Arquivado 14 de decembro de 2019 en Wayback Machine.". Nevada State Museum.
- ↑ Bulfinch, C. (2019). "Carson City Mint celebrates 150th anniversary with events, medal". En Coin World. 27 de xuño.
- ↑ "H.R.3757 - 1921 Silver Dollar Commemorative Coin Act". Congress.gov
- ↑ Gilkes, P. (2019). "Legislation seeks 2021-CC Morgan dollar struck at old Carson City Mint". En Coin World. 16 de xullo.
- ↑ Gilkes, P. (2019). "https://www.coinworld.com/news/us-coins/ana-rallies-collectors-to-urge-congressional-support-for-morgan-and-peace-dollars-bill". En Coin World. 26 de xullo.
Véxase tamén editar
Wikimedia Commons ten máis contidos multimedia na categoría: Casa da Moeda de Carson City |