Carmen Blanco García

Para outras páxinas con títulos homónimos véxase: Carmen Blanco.

Carmen Blanco García, nada en Lugo o 12 de maio de 1954, é unha escritora e feminista galega autora de poesía, narrativa e ensaio, e profesora da Universidade de Santiago de Compostela.

Carmen Blanco
Nome completo	Carmen Blanco García
Nacemento	12 de maio de 1954
Lugar de nacemento	Lugo
Nacionalidade	España
Ocupación	poeta, ensaísta, narrador e escritora
Cónxuxe	Claudio Rodríguez Fer
Fillos	unha
Xéneros	Ensaio, poesía, narrativa
Na rede
[ editar datos en Wikidata ]

Participou dende os anos setenta no movemento de liberación das mulleres, e, como ensaísta, centrouse especialmente nas interrelacións de poder, muller, sexo, lugar, memoria, cultura, arte e literatura, temática na que afondou nun camiño libertario na súa obra ensaística e literaria. Centrouse tamén en literatura e cultura galegas, tendo colaborado, asemade, en numerosos libros colectivos, actas de congresos, revistas especializadas e xornais.

Traxectoria

Traxectoria vital

A comezos dos setenta participou no movemento feminista galego a través de organizacións como a Asociación Galega da Muller (AGM) ou Feministas Independentes Galegas. Tamén colaborou coa revista Festa da Palabra Silenciada e con A Saia. No ano 2000, fixo a letra do himno galego da Marcha Mundial das Mulleres, "Marchando máis alá". Dedicou boa parte do seu activismo ao feminismo e ao estudo das relacións entre a literatura e a muller, do que son mostra os libros "Literatura galega da muller" 1989, "Nais, damas, prostitutas e feirantas" 1995, "O contradiscurso das mulleres" 1995, "Mulleres e independencia" 1995, "Sexo e lugar" 2006, "Feministas e libertarias" 2010 ou "Letras lilas"2019.

Esta placa co texto "Amo, mais non teño amo", de Carmen Blanco, foi instalada nun monólito o 25/11//2008 en memoria das vítimas da violencia de xénero, na praza de Emilia Pardo Bazán do Carballiño.

Foi profesora agregada de Lingua e Literatura Española, con primeiro destino en Santiago de Compostela e segundo en Chantada (Lugo), e de Lingua e Literatura Galega de ensino medio, con destino en Lugo, así como titular destas últimas disciplinas na Escola Universitaria de Formación do Profesorado de Lugo e na Facultade de Humanidades de Lugo. En 1994, leu na Universidade de Santiago de Compostela a súa tese de doutoramento "Imaxes de mulleres na literatura galega contemporánea á luz dos discursos feministas", dirixida por Anxo Tarrío. No momento actual, exerce como profesora titular de Literatura Galega da Universidade de Santiago de Compostela no Campus de Lugo.

É autora dunha morea de obras ensaísticas do seu campo profesional de coñecemento, a filoloxía e a literatura galegas, con libros referidos a moitas das grandes figuras como Ricardo Carvalho Calero, Luz Pozo Garza, Uxío Novoneyra ou María Mariño. Colaborou en gran cantidade de libros colectivos, actas de congresos, revistas especializadas e xornais.

Dende 1974, comparte vida e parte da súa actividade profesional e civil con Claudio Rodríguez Fer, con quen ten unha filla. Con el fundou no 2005 a Asociación para a Dignificación das Vítimas do Fascismo, onde exerceu de secretaria. Formou parte do Consello da Memoria, recibiu o Premio Galiza Mártir da Fundación Alexandre Bóveda (2014) e é autora, con Rodríguez Fer, da exposición “Vermellas” (2009) e do libro “Vivas en nós” (2011), en homenaxe ás mulleres represaliadas polo levantamento militar de 1936.

Traxectoria artística

Coordina, co poeta Claudio Rodríguez Fer, a publicación intercultural e libertaria Unión Libre, Cadernos de vida e culturas, dende 1996.

A súa obra poética consta dos poemarios Estraña estranxeira (BVG, 2004), Un mundo de mulleres (Biblos, 2011) e Lobo amor (Unión Libre, 2011).

A súa obra narrativa está conformada por Vermella con lobos (Xerais, 2004) e Atracción total (Xerais, 2008).

Cultivou a creación plástica deseñando e ilustrando os poemarios Tigres de ternura (Reprografía 1846, 1981, 1982) -Premio da Crítica Española en 1982-, Historia da lúa (Galaxia, 1984), Vulva (Libros da cebra, 1990) e A muller núa (Compostela, 1992) de Claudio Rodríguez Fer, ao igual que o Manifesto por un movemento vital (1990) deste mesmo autor, e foi tamén a creadora do logotipo de Unión Libre.

A súa heterónima Emma Luaces, que leva o nome en homenaxe á anarquista rusa Emma Goldman e á xenealoxía materna da autora, publicou versións de Safo en Do amor e da literatura (Linteo, 2007) e poemas da serie “Lobo azul” (Unión Libre, 2005).

Obra en galego

Ensaio

• Carballo Calero: política e cultura (Ediciós do Castro, 1991). ISBN 84-7492-519-3
• Literatura galega da muller (Edicións Xerais de Galicia, 1991). ISBN 84-7507-560-6
• Escritoras galegas (Biblioteca 114, Editorial Compostela, 1992). ISBN 84-85553-98-5
• Libros de mulleres. (Por unha bibliografía de escritoras en lingua galega: 1863-1992) (Edicións do Cumio, 1994). ISBN 84-87126-86-3
• O contradiscurso das mulleres (Nigra, 1995). ISBN 84-87709-36-2
• Mulleres e independencia (Edicións do Castro, 1995). ISBN 84-7492-754-4
• Nais, damas, prostitutas e feirantas (Xerais, 1995). ISBN 84-7507-910-5
• Luz Pozo Garza: a ave do norte (Linteo, 2002). ISBN 84-931893-9-1
• Alba de mulleres (Xerais, 2003). ISBN 84-8302-970-7
• Sexo e lugar (Xerais, 2006). ISBN 84-9782-398-2
• Casas Anarquistas de Mulleres Libertarias (CNT, 2007).
• María Mariño. Vida e obra (Xerais 2007). ISBN 978-84-9782-537-5
• Uxío Novoneyra (A Nosa Terra, 2009). ISBN 978-84-8341-420-0
• Feministas e libertarias (Meubook, 2010). ISBN 978-84-15141-06-8
• Novoneyra: un cantor do Courel a Compostela. O poeta nos lugares dos seus libros (Toxosoutos, 2010). ISBN 978-84-92792-39-9
• Letras lilas (Unión Libre, 2019)

Narrativa

• Vermella con lobos (Xerais, 2004). ISBN 978-84-9782-180-3
• Atracción total (Xerais, 2008). ISBN 978-84-9782-759-1

Poesía

• Estraña estranxeira (Biblioteca Virtual Galega, 2004).
• Un mundo de mulleres (Biblos Clube de Lectores, 2011). ISBN 978-84-15086-11-6
• Lobo amor (Unión Libre, 2011).

Conversas

• Conversas con Carballo Calero (Galaxia, 1989). ISBN 84-7154-654-X

Traducións

• Do amor e da literatura (Linteo, 2007).

Edicións

• Códice Calixtino, de Luz Pozo Garza (Xerais, 1992).
• Umha voz na Galiza, de Ricardo Carvalho Calero (Sotelo Blanco, 1992).
• Antoloxía poética, de Uxío Novoneyra (A Nosa Terra/AS-PG, 1997).
• Historias fidelísimas, de Luz Pozo Garza (PEN Clube de Galicia, 2003).
• Memoria solar, de Luz Pozo Garza (Linteo, 2004).
• Día das Letras Galegas 2016. Manuel María. Compostela: Servizo de Publicacións e Intercambio Científico da USC. ISBN 9788416533626

Obras colectivas

• Na boca do lobo. Carapuchiña Vermella vista por... (Editorial Tris Tram, 1998).
• Día das Letras Galegas 2007. María Mariño Carou (USC, 2007). Editora e autora.
• Cartafol de soños, homenaxe a Celso Emilio Ferreiro no seu centenario (1912-2012) (2012).
• Rosalía na cobiza do lonxe (Centro Ramón Piñeiro para a Investigación en Humanidades, 2013).
• Unha cesta de pombas e mazás. Homenaxe a Isaac Díaz Pardo (Academia Real Isaac Díaz Pardo, 2013).
• 150 Cantares para Rosalía de Castro (2015, libro electrónico).
• De Cantares Hoxe. Os Cantares gallegos de Rosalía de Castro no século XXI (2015, Fundación Rosalía de Castro/Radio Galega).
• Abadessa, oí dizer. Relatos eróticos de escritoras da Galiza (2017, Através Editora).

Con Claudio Rodríguez Fer

• Tigres de ternura (Reprografía 1846, 1981, 1982). Deseñadora.
• Con pólvora e magnolias, de Xosé Luís Méndez Ferrín (Xerais, 1989). Coeditora.
• Os eidos, de Uxío Novoneyra (Xerais, 1990). Coeditora. ISBN 978-84-7507-455-9
• Vermellas (Universidade de Santiago de Compostela, 2009).
• Vivas en nós (Comisión para a Recuperación da Memoria Histórica da Coruña, 2011).

Obra en castelán

Edicións

• Extranjera en su patria. Cuatro poetas gallegos. Rosalía de Castro, Manuel Antonio, Luís Pimentel, Luz Pozo Garza (Círculo de Lectores / Galaxia Gutenberg, 2005), edición bilingüe galego-castelán.

Véxase tamén

Bibliografía

• "Blanco García, Carmen". Diccionario enciclopédico galego universal 9. La Voz de Galicia. 2003-2004. p. 94. ISBN 84-7680-429-6. 
• "Blanco García, Carmen". Dicionario biográfico de Galicia 1. Ir Indo Edicións. 2010-2011. pp. 117–118. 
• "Blanco García, Carmen". Diciopedia do século 21 1. Do Cumio, Galaxia e do Castro. 2006. p. 324. ISBN 978-84-8288-942-9. 
• "Blanco García, Carmen". Enciclopedia Galega Universal 3. Ir Indo. 1999-2002. p. 371. ISBN 84-7680-288-9. 
• "Blanco García, Carmen". Gran Enciclopedia Galega Silverio Cañada (DVD). 2005. ISBN 84-87804-88-8. 
• Alvarellos, Enrique (1993). Mulleres destacadas de Galicia. Alvarellos. pp. 37–38. ISBN 84-85311-96-5. 
• Fernández del Riego, F. (1990). Diccionario de escritores en lingua galega. p. 52. Ediciós do Castro.
• Vilavedra, Dolores, ed. (1995). Diccionario da Literatura Galega I. Galaxia. p. 83. ISBN 84-8288-019-5. 

Outros artigos

• Unión Libre
• Claudio Rodríguez Fer

Ligazóns externas

• Carmen Blanco na Biblioteca Virtual Galega.
• Requeixo, Armando, «Parlamento das Letras: Carmen Blanco», "Criticalia", 8-2-2012