Benigno Lago Estévez
Benigno Lago Estévez, nado en Corcubión en 1897 e finado no mesmo concello o 29 de marzo de 1976,[1] foi un empresario galego. Dedicouse a empresas pesqueiras no Perú, iniciando unha cadea migratoria de mariñeiros da Costa da Morte ao Perú.
| Benigno Lago Estévez | |
|---|---|
 | |
| Nacemento | 1897 |
| Lugar de nacemento | Corcubión |
| Falecemento | 29 de marzo de 1976 |
| Lugar de falecemento | Corcubión |
| Nacionalidade | España |
| Ocupación | empresario |
| [ editar datos en Wikidata ] | |
Traxectoria editar
No ano 1920 casou con Constanza Figueroa, natural de Fisterra e ese mesmo ano emigraron á Patagonia arxentina, en concreto, á localidade de Río Gallegos. Nesta localidade acadou unha boa situación económica, dirixiu unha axencia de aduanas e unha consignataria de buques. En xullo de 1925 regresou a Galicia por un tempo[2]. En 1931 a súa muller e os tres fillos trasládanse a Galiza polos estudos dos rapaces e Lago Estévez marchou ao Perú, atraído polas súas riquezas mineiras. Nun principio dedicouse á explotación mineira de mica e caza de lobos de mar. A raíz da segunda guerra mundial, exportou xunto cun socio peruano fígado de bonito aos Estados Unidos e Europa. Con axuda de capital norteamericano, construíu a primeira fábrica pesqueira do país, La Chalaca, a primeira no porto de Callao e a segunda en Ilo. Despois fundou novas fábricas en Chimbote, Samanca e Chancay. En 1948 instouse pola súa conta e mercou a fábrica Aguarima en Mollendo, pondo á fronte a seu fillo Salvador. En 1954 toda a familia volveu a Corcubión. Na súa vila natal continuou os seus negocios pesqueiros, mais con menos fortuna. En 1980 rendéuselle unha homenaxe e inaugurouse un pequeno monumento na súa honra.
Vida persoal editar
Casou con Constanza Figueroa Carrera e foi pai de Jaime, Alberto, Salvador e Sara Lago Figueroa.
Notas editar
- ↑ La Voz de Galicia, 27-3-1977, p. 51.
- ↑ El Ideal Gallego, 7-7-1925, p. 3.
