Autoestrada

vía de circulación de automóbiles

Unha autoestrada é unha vía de circulación de automóbiles e vehículos terrestres de carga; é rápida e segura e admite un volume de tráfico considerable, e diferénciase dunha estrada en que a autoestrada dispón de dobre carril para cada sentido con calzadas separadas.

Sinal de autoestrada.
Autoestrada AP-9 cara a Vigo.

As primeiras vías construídas con esta configuración fixéronse en Italia durante os anos vinte do século XX. Dentro dos tipos de estradas representan as vías que máis tráfico rodado poden soportar e nas que este alcanza maiores velocidades polo que representan os eixos principais da rede viaria dun país desenvolvido.

Características editar

Para poder ser cualificada como autoestrada, unha vía de circulación debe reunir as seguintes características:

  • Dúas calzadas de circulación, unha para cada sentido, separadas entre si por unha franxa ancha de terreo ou por valas de protección.
  • Polo menos dous carrís de circulación en cada calzada.
  • Beiravías laterais en cada calzada, para que un vehículo poida deterse en caso de urxencia sen obstaculizar o tráfico.
  • Curvas pouco pronunciadas para que os vehículos non teñan que minorar a marcha ao circular por elas.
  • Ausencia de cruces a nivel, que se resolven mediante pasos superiores ou inferiores.
  • Entradas e saídas con carrís, separados dos principais, de desaceleración e de aceleración para que os vehículos que saen ou entran na autoestrada cambien a súa velocidade fóra dela.
  • As saídas e entradas están situadas case sempre no lado dereito no sentido da marcha, xa que o carril esquerdo é o de adiantamento e, polo tanto, o máis rápido.
  • O acceso aos inmobles lindeiros coa autoestrada non se realiza directamente desde a mesma a menos que se utilicen entradas e saídas como as antes descritas. Nas zonas urbanas é habitual a existencia de rúas paralelas situadas a cada lado denominadas "vías de servizo" ou "colectoras" que permiten o acceso aos inmobles que limitan coa autoestrada sen perturbaren o tránsito da mesma.

Galería de imaxes editar

Véxase tamén editar

Outros artigos editar