Antonio Romero Ortiz

Antonio Romero Ortiz, nado en Santiago de Compostela o 24 de marzo de 1822 e finado en Madrid o 18 de xaneiro de 1884, foi un político liberal, ministro de Gracia y Justicia durante o Sexenio e ministro de Ultramar durante os gabinetes de Zavala e de Sagasta. Tamén foi un persoeiro importante no movemento do provincialismo galego.

Antonio Romero Ortiz
Nacemento	24 de marzo de 1822
Lugar de nacemento	Santiago de Compostela
Falecemento	18 de xaneiro de 1884
Lugar de falecemento	Madrid
Soterrado	Sacramental de San Lorenzo y San José
Nacionalidade	España
Alma máter	Universidade Complutense de Madrid
Ocupación	político, avogado e xornalista
[ editar datos en Wikidata ]

Traxectoria

Fillo do notario Domingo Manuel Romero e de Rita García Mariño, en 1837 conseguiu o título de Bacharel en Filosofía e en 1843 licenciouse en Dereito na Universidade Central de Madrid.

Romero Ortiz participou na Academia Literaria de Santiago durante os seus anos de estudante. Fundou con José Rúa Figueroa o periódico satírico de literatura e costumes Santiago y a ellos, que axiña foi prohibido. Máis tarde, xunto con Rúa Figueroa e Antolín Faraldo, foi editor da revista El Porvenir, dirixida por Faraldo.

Foi elixido deputado polo distrito da Coruña en 1854, polo de Noia en 1858, polo de Benisa (Alacant) e Noia en 1863 (o 20 de abril de 1864 optou por Noia), volveu ser elixido por Noia en 1864, en 1865 por Alcoi e Santiago de Compostela (correspondeulle representar a Compostela mediante sorteo); outra vez por Alcoi e Santiago en 1869 (optou de novo por Compostela). Volveu ser elixido por Noia en 1871, volvendo ser reelixido polo mesmo distrito ata 1884.

Foi Ministro de Gracia y Justicia inmediatamente despois da Gloriosa (de 8-10-1868 a 22-2-1869 e de 25-2-1869 a 18-6-1869). O 13 de marzo de 1878 foi nomeado ministro de Ultramar, cargo que desempeñou con Zavala e con Sagasta. Foi un destacado masón, que acadou o grao de Soberano Gran Comendador do Supremo Consello en 1882. Dende marzo de 1881 até outubro de 1883, foi gobernador do Banco de España.

Véxase tamén

Bibliografía

• Baró Pazos, Juan (1993). La codificación del derecho civil en España, 1808-1889 (en castelán). Santander: Servicio de publicaciones Universidad de Cantabria. ISBN 84-8102-002-8. 
• Pereira Martínez, Carlos (2008). "A Francmasonería na comarca do Barbanza" (PDF). Anuario de estudos do Barbanza (4): 103–127. 
• Priego Fernández del Campo, José; Cabezón, Pilar (1998). "La colección "Romero Ortiz" un museo romántico" (PDF). Militaria-revista de cultura militar (en castelán) 7: 455–475. ISSN 0214-8765. Arquivado dende o orixinal (PDF) o 26 de novembro de 2011. Consultado o 01 de marzo de 2008. 

Outros artigos

• Lista de gobernadores do Banco de España

Ligazóns externas

• Ficha no Congreso dos DeputadosArquivado 16 de outubro de 2019 en Wayback Machine.