Acacia negra

A acacia negra (Acacia melanoxylon), tamén chamada oliveira de Australia ou simplemente acacia é unha especie nativa do leste de Australia. Coñecida coma "madeira negra de Tasmania", esta árbore medra axiña e acada alturas de 45 m. Ten ampla tolerancia a unha gran diversidade de ambientes, mais prospera mellor en climas fríos.

En Galicia está catalogada como especie exótica invasora.

Problemática

Como moitas outras acacias (por exemplo a mimosa), en moitos países pode transformarse nunha especie invasora. O seu control ocasiona altos custos. En Galicia aparece nas zonas máis temperadas, preto da costa, onde se estendeu con gran rapidez dando lugar a formacións escuras.

Descrición

Árbore perennifolia de 8 a 15 (até 45) m de alto; fuste recto, copa densa de piramidal a cilíndrica, ás veces con poucas pólas moi pesadas. Ten un sistema radicular extenso, mesto, con raíces fortes superficiais.

Folla

As follas son bipinnadas nos individuos e pólas máis novas. Os individuos adultos, en troques, substitúen as follas por filodios (coma ocorre nos eucaliptos). Os filodios teñen de 7 a 10 cm de longo, de cor cinsenta a verde escura, rectos a mainamente tortos, con 3 a 7 veas prominentes lonxitudinais e veas magras entre eles.

Flor

As flores son de cor amarela esbrancuxada. Fican en testas globosas.

Froito

Os froitos, como fabácea, son vaíñas de cor parda-avermellada, tortas, máis angostas cós filodios.

Semente

As sementes son planas, arredondadas, negras, de 2 a 3 mm lonxitude.

Reprodución

Espallamento das sementes: Darredor das sementes hai uns fíos arroibados característicos que chama á atención dos paxaros, que espallan as sementes. Isto tamén ocorre onde a especie foi introducida, como en Galicia ou Suráfrica. Se non existir os fruxívoros as sementes caen no chan almacenándose, logo, no solo. Os bancos de sementes fican viábeis por moitos anos. As sementes xermolan de xeito doado se se mergullan unha noite en auga moi quente, cando o banco de sementes fica exposto ao sol, ou despois dos lumes forestais (Hill, 1982). Acacia melanoxylon reprodúcese prolificamente despois dos incendios. Pode ademais reporducirse vexetativamente.

• 
  Flores
• 
  Vaíñas e sementes
• 
  Follas
• 
  Casca