Snapchat

Snapchat é unha aplicación móbil gratuíta desenvolvida por Evan Spiegel e Robert Murphy que permite enviar fotografías, vídeos e mensaxes de texto que se autodestrúen aos dez segundos, como máximo. Estes contidos son coñecidos como Snaps.

Snapchat
Localización	Stanford, Estados Unidos
Persoas clave	Evan Spiegel e Robert Murphy
Industria	software, Internet, mensaxería
Na rede
https://www.snapchat.com/
[ editar datos en Wikidata ]

A aplicación pódese descargar dende a App Store para dispositivos Apple e dende a Play Store para dispositivos Android. Na Play Store está catalogada dentro do nivel de madureza medio e na App Store para 12+.

Historia

Snapchat foi lanzada en setembro de 2011 na App Store. Evan Spiegel e Robert Murphy, estudantes na Universidade Stanford, quixeron dar un xiro ás modas das fotografías retocadas e con filtros para crear un espazo onde se puidesen compartir imaxes incómodas e divertidas.

En 2013, Facebook ofreceu 3000 millóns de dólares pola aplicación, a oferta máis cara que a empresa tería feito ata a data. O 31 de decembro de 2013, un usuario violou a seguridade deSnapchat e relacionou 4,6 millóns de números de teléfonos dunha base de datos cos seus nomes de usuario. A compañía, mediante un comunicado no seu blog, asegurou dous días despois que ningunha outra información ou contido audiovisual se filtrou.

Funcionamento

Evan Spiegel, fundador de Snapchat

Unha vez descargada a aplicación, o rexistro é obrigatorio para usala. Para rexistrarse é necesario completar o correo electrónico, un contrasinal e a data de nacemento, ademais de aceptar as condicións de uso e confirmar a lectura da política de privacidade. Tamén se ha de escoller un nome de usuario e, se se quere, pódese rexistrar o número de teléfono. Para evitar contas fantasma, incluíuse tamén un filtro antirrobots.

Ao abrirse a aplicación aparece a pantalla principal, que permite facer fotos ou vídeos, engadir texto ou debuxos a estes, activar ou desactivar o flash e cambiar entre a cámara frontal e a traseira. Pulsando o botón cadrado (esquina inferior esquerda) ou deslizando a pantalla á dereita aparecen o historial de Snapchat e o acceso ao menú de axustes. Pulsando no botón de tres raias horizontais (esquina inferior dereita) ou deslizando a pantalla á esquerda, accedemos á lista de amigos e ao menú de agregar amigos.

Dende os axustes pódense cambiar o número de teléfono ou o correo electrónico asociados, pero non se pode modificar o nome de usuario. Este menú tamén permite xestionar a privacidade (quen pode enviarche Snaps ou quen pode ver a túa Historia), elixir o número de mellores amigos ou activar e desactivar funcións como os sons das notificacións, os filtros, o flash frontal, a repetición e o texto especial. Se se rexistrou o número de teléfono, a aplicación permite acceder á axenda de contactos e agregar amigos dende esta lista. Tamén se poden buscar amigos polo nome de usuario.

As fotografías e os vídeos fanse dende a pantalla de inicio co botón circular. Para facer unha fotografía, abonda con pulsar o botón; para facer un vídeo hase de manter pulsado o devandito botón. Unha vez realizados, pódese desbotar a fotografía ou o vídeo pulsando na X, debuxar sobre eles pulsando o lapis (desprégase unha barra que permite cambiar a cor coa que se debuxa), cambiar o tempo durante o que se mostrará a fotografía (dende 1 a 10 segundos) ou activar e desactivar o son do vídeo, gardar a fotografía na memoria interna do móbil, engadila á historia ou enviar a algúns amigos (ábrese un menú cos amigos agregados onde se seleccionan). Tamén se pode agregar texto pulsando en calquera parte da pantalla ata 31 caracteres (pulsando na T pódese cambiar o formato do texto) e engadir filtros (sepia, azul, branco e negro, velocidade, temperatura e hora) deslizando a pantalla a dereita ou esquerda.

Para visualizar os Snaps recibidos, hai que manter pulsado sobre o contacto no historial de Snapchat. Se hai varios Snaps acumulados, pódese saltar ao seguinte pulsando noutra parte da pantalla sen soltar o primeiro punto de presión. As fotografías veñen marcadas por un cadrado vermello e os vídeos por un morado. Se hai algún Snap sen visualizar, os cadrados aparecerán recheos da mesma cor; se non, estarán en branco.

Cando se envían Snaps, pódese facer un seguimento do estado entre enviado, entregado e visto e a hora na que a última acción aconteceu. Utilízase o mesmo código de cor que para os Snaps recibidos, pero o cadrado toma a forma dunha frecha no caso dos enviados.

Dende o historial, deslizando un nome cara á dereita, accedemos a un chat privado co contacto seleccionado. Neste chat aparecen tamén as fotografías e os vídeos que haxa pendentes, pero unha vez visualizados desaparecerán da lista. As mensaxes de texto tamén desaparecen unha vez que a persoa que os recibe os le, pero pódense manter na memoria pulsando sobre eles (a liña da esquerda e a letra aparecerán máis grosas para indicar que se gardou). Dende o botón amarelo pódese agregar unha fotografía ao texto, xa sexa nova ou importada da galería do teléfono. Se os dous contactos manteñen apertados o botón amarelo (vólvese azul cando a función está dispoñible), iníciase un chat de vídeo. As mensaxes de texto veñen notificadas coa cor azul.

É posible realizar unha captura de pantalla nas fotografías, vídeos ou chats recibidos, pero o remitente recibirá unha notificación de que se realizou a devandita captura.

Geofilters

En xullo de 2014 foron engadidos os geofilters, filtros persoais para un lugar ou evento determinado, funcionando co GPS do dispositivo móbil. Na Galiza están dispoñíbeis os seguintes geofilters:

Concello	Número de GF
A Coruña	1
Lugo	2
Ourense	2
Pontedeume	2
Pontevedra	3
Santiago de Compostela	2
Vigo	2

Ferrol e Ponferrada son as únicas das grandes cidades nas que se fala galego que non teñen geofilter.

Actualizacións importantes

Para dispositivos Apple

• Versión 2.0.0: engadiu as características de mellores amigos, encontrar contactos, enviar a grupos e engadir texto.
• Versión 2.1.0: engadiu a función de encontrar amigos de Facebook.
• Versión 3.0.0: engadiu as funcións de gardar Snaps na galería do teléfono e de ver perfís de Snapchat.
• 3.1.0: engadiu a función de debuxo, a de recuperación de contrasinal e a cámara ultrarrápida.
• 4.0.0: optimizou a aplicación para iPhone 5 e engadiu as funcións de vídeo, rotación da pantalla, filtro "quen pode enviarche Snaps", integración da axenda do teléfono, enfocar e captura máis rápida.
• 4.0.2: corrixiu que o reprodutor de música cortárase ao usar Snapchat.
• 5.0.0: engadiu as funcións deslizables e a dobre pulsación para contestar.
• 5.0.1: apareceu Snapkidz.
• 5.0.2: incluíu vídeo de alta calidade.
• 5.0.5: engadiu a opción de activar ou desactivar o son das notificacións.
• 6.0.0: engadiu a Historia e a función de "enviar a todos".
• 6.0.2: engadiu o filtro "quen pode ver a miña historia".
• 6.1.0: incluíu as novidades de filtros visuais, texto especial, repetir, flash frontal e aumentar os mellores amigos ata 7.
• 7.0.0: engadiu chat e chat de vídeo.
• 7.0.2: engadiu as opcións de eliminar historial e eliminar chats.

Véxase tamén

Outros artigos

• WhatsApp
• Galegram
• Catfishing

Ligazóns externas

• Páxina web oficial
• Facebook publica por error Slingshot, una aplicación similar a Snapchat
• Snapkidz, una versión de Snapchat para menores de 13 años
• Snapchat, los peligros de la aplicación que más gusta a los adolecentes