Rapante pintado
| Rapante pintado Lepidorhombus boscii | |||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
| |||||||||||||||||||||||||
| Clasificación científica | |||||||||||||||||||||||||
| |||||||||||||||||||||||||
| Nome binomial | |||||||||||||||||||||||||
| Lepidorhombus boscii Risso, 1810 | |||||||||||||||||||||||||
O rapante pintado, tamén coñecido como ollón,[1][2] rapante de catro manchas,[3] e, sobre todo, como meiga (de Fisterra "para arriba") e rapante (de Fisterra "para abaixo"), cientificamente Lepidorhombus boscii (Risso, 1810), é un peixe teleósteo da orde dos pleuronectiformes, suborde dos pleuronectoideos e familia dos escoftálmidos,[4]
Taxonomía editar
A especie foi descrita por primeira vez en 1810 polo naturalista nizardo Antoine Risso baixo o nome de Pleuronectes boscii,[4] que dedicou ao seu colega Louis-Augustin Bosc d’Antic.
Sinónimos editar
Ademais de polo basónimo citado, a especie tamén se coñeceu polos sinónimos:[4]
- Arnoglossus boscii (Risso, 1810)
- Hippoglossus boscii (Risso, 1810)
- Rhombus boscii (Risso, 1810)
Descrición editar
Peixe aplanado e de corpo moi alongado, mide entre os 20 e os 40 cm de lonxitude e pesa entre os 200 gr e os 1.500 gr.[5] Ten os ollos situados no lado esquerdo, ambos os dous separados por unha crista ósea (o inferior esta mais adiantado). Lepidorhombus boscii presenta catro pintas escuras e redondas en cada unha das aletas anal e dorsal,[6] e posúe unhas escamas que son caedizas e do mesmo xeito que en Lepidorhombus wiffiagonis (o rapante común) son ctenoides no lado pigmentado e cicloides) no lado cego.[7]
As súas mandíbulas superiores con dentes moi pequenos e curvados acadan as proximidades da vertical que pasa polo centro do ollo e a lonxitude desta é de igual magnitude para ambos os lados da boca que é ancha e oblicua. A aleta dorsal ten 78/86 radios, a anal 65/69, a pectoral 11/12 e a ventral 6. Todos os radios son brandos.
Posúe de 11 a 13 branquispinas na rama inferior do primeiro arco branquial.
Hábitat e situación editar
Vive moi próximo ao fondo (é demersal), nos bancos areosos da masa de auga que é o seu hábitat a uns 1.000 ou 900 metros aproximadamente.
Lepidorhombus boscii atópase nas augas do Atlántico nororiental, no mar Cantábrico e no Mediterráneo occidental.
En Galicia editar
A primeira cita desta especie en Galicia débese a De Buen, no seu traballo de 1935 "Fauna ictiológica. Catálogo de los peces ibéricos de la planicie continental, aguas dulces, pelágicos y de los abismos próximos. II parte!, Not. y Res. Inst. Esp. Ocean. 82: 1-89.[2]
A outra especie do xénero editar
Ademais do rapante pintado (Lepidorhombus boscii), hai outra especie denominada rapante común (Lepidorhombus whiffiagonis) que se diferencia deste en que non ten as catro manchas escuras do final do corpo e tamén en que o tamaño do rapante común é algo maior. Na praza diferéncianse en que o pintado ten unha cor máis escura e as raias debaixo da pel son lixeiramente máis grosas e máis escuras que o rapante común.
O rapante pintado cotizábase en agosto de 2012 a uns 12 €/kg mentres que o común a uns 7 €/kg.
Notas editar
- ↑ Rodríguez Solórzano et. al. (1983), p. 182.
- ↑ 2,0 2,1 Rodrígue Villanueva el al. (1995), pp. 280-281.
- ↑ Lahuerta Mouriño, Fernando e Francisco X. Vázquez Álvarez (2000): Vocabulario multilingüe de organismos acuáticos. Santiago de Compostela: Xunta de Galicia / Termigal. ISBN 84-453-2913-8, p. 83.
- ↑ 4,0 4,1 4,2 Lepidorhombus boscii (Risso, 1810) no WoRMS.
- ↑ Ficha do peixe (en castelán)
- ↑ Ao que debe o nome que lle outorgaron Lahuerta e Vázquez.
- ↑ Ficha do rapante na web de gastronomíadegalicia.com da Xunta de Galicia.
Véxase tamén editar
Wikimedia Commons ten máis contidos multimedia na categoría: Rapante pintado  |
Bibliografía editar
- Muus, Bent J.; Jørgen G. Nielsen; Preben Dahlstrøm e Bente O. Nyström (1998): Peces de mar del Atlántico y del Mediterráneo. Barcelona: Ediciones Omega. ISBN 84-282-1161-2.
- Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.
- Rodríguez Solórzano, Manuel; Sergio Devesa Regueiro e Lidia Soutullo Garrido (1983): Guía dos peixes de Galicia. Vigo: Editorial Galaxia. ISBN 84-7154-433-4.
- Rodríguez Villanueva, X. L. e Xavier Vázquez (1995): Peixes do mar de Galicia. (III) Peixes óseos (continuación). Vigo: Edicións Xerais de Galicia. ISBN 84-7507-870-2.
Outros artigos editar
Ligazóns externas editar
- Lepidorhombus boscii en FishBase (en inglés). Con información, fotos e mapa de distribucción.
- Lepidorhombus boscii en Ictioterm (en castelán)