Ponta Delgada

Ponta Delgada é unha cidade portuguesa, capital da Rexión Autónoma dos Azores, cuxa poboación no ano 2011 era de 68.809 habitantes. A cidade atópase no suroeste da Illa de São Miguel, a máis grande e habitada das 9 illas principais do arquipélago.

Ponta Delgada

Localización
37°44′N 25°40′O
Estado	Portugal
Rexión Autónoma	Azores
Capital de	Azores
Contén a división administrativa	Ajuda da Bretanha (pt) Arrifes (pt) Candelária (pt) ../... 24+
Poboación
Poboación	68.809 (2011) (295,33 hab./km²)
Xeografía
Superficie	232,99 km²
Altitude	0 m
Comparte fronteira con	Ribeira Grande Lagoa (pt)
Creación	1450 (Gregoriano)
Identificador descritivo
Código postal	9504
Prefixo telefónico	296
Outro
Irmandado con	Fall River (pt) Newport (pt) Pleven (2007–)
Páxina web	cm-pontadelgada.pt

Casa do concello de Ponta Delgada.

Historia

Fundada en 1449 como unha vila de pescadores, en 1546 foi declarada capital das illas polo rei Xoán III O Piadoso. En 1582 tivo lugar fronte á súa costa a batalla naval de San Miguel no marco da crise de sucesión portuguesa. No século XIX a súa economía medrou por mor das exportacións de froita ó Reino Unido. Ponta Delgada foi bombardeada durante a primeira guerra mundial por submarinos alemáns, e logo da guerra acolleu unha base naval dos Estados Unidos.

Economía e turismo

Nos últimos anos a economía local tanto da cidade como da illa céntrase na agricultura e no turismo. En 2008 a cidade modernizouse coa construción dunha nova terminal para cruceiros turísticos chamada "Portas do Mar", que inclúe un novo porto deportivo, un paseo marítimo, tendas, restaurantes, un pavillón multiúsos, un anfiteatro, piscinas etc. A cidade conta tamén cun centro comercial. No tocante á arquitectura tradicional, na cidade salientan o Convento da Nosa Señora da Esperanza, a Sinagoga de Ponta Delgada, as Portas da Cidade, o Forte de São Brás (que acolle un importante museo militar), o Museo Carlos Machado e o Teatro Micaelense.

Porto de Ponta Delgada.

Educación

En 1976 fundouse a Universidade dos Açores, que conta cuns 4000 estudantes. Nela impártense carreiras de bioloxía, enfermaría, economía, educación, historia, filosofía, matemáticas, ciencias sociais, literatura, lingua, tecnoloxía e xeoloxía.

Comunicacións

A principal porta de entrada e saída da cidade e da illa é o Aeroporto Xoán Paulo II, inaugurado en 1969, cunha pista de aterraxe de 2525 metros, que empregan cada ano uns 750.000 viaxeiros. O número de pasaxeiros desta terminal aérea convértena no 5º aeroporto mais importante de Portugal, tralo Aeroporto da Portela (Lisboa), o Aeroporto de Sá Carneiro (Porto), o Aeroporto de Faro e o Aeroporto de Madeira.

Deportes

O Clube Desportivo Santa Clara é o equipo de fútbol mais salientable da cidade. Chegou a disputar 3 edicións da Primeira Liga, e durante a tempada 2011-12 milita na Liga de Honra. Viste de vermello, e xoga os seus encontros como local no Estádio de São Miguel, que ten capacidade para acoller a máis de 15.000 seareiros. Neste equipo comezou a súa carreira Pedro Pauleta, o máximo goleador histórico da selección portuguesa, que é natural da cidade.

Véxase tamén

Ligazóns externas

• Páxina do goberno consistorial de Ponta Delgada (en portugués)
• Portal informativo dos Azores (en portugués)