Manuel Fernández Soto
Manuel Fernández Soto, coñecido como Coronel Benito ou Soutiño, nado en Mugardos en 1902 e finado en Penacova (Bóveda) o 22 de xuño de 1949, foi un militar, político e guerrilleiro antifranquista galego.
| Biografía | |
|---|---|
| Nacemento | 1902  Mugardos, España |
| Morte | 22 de xuño de 1949 (46/47 anos) Penacova, España |
| Datos persoais | |
| Outros nomes | Coronel Benito Soutiño |
| País de nacionalidade | España |
| Actividade | |
| Ocupación | membro da resistencia |
| Lingua | Lingua castelá |
| Carreira militar | |
| Conflito | Guerra civil española |
Traxectoria editar
Mariñeiro do acoirazado Jaime I cando se produciu o golpe de Estado do 18 de xullo de 1936, ao ano seguinte afiliouse ao PCE. Ao final da guerra civil estivo no campo de concentración de Bicerta (Tunisia). Despois marchou á Unión Soviética, alistouse no Exército Vermello en agosto de 1942 e loitou na segunda guerra mundial nunha unidade da NKVD e combatiu nos Cárpatos ata novembro de 1944. Concedéronlle a Orde da Guerra Patria.
Trasladouse á Arxentina e a finais de 1945 volveu a Galicia para formar parte da dirección da guerrilla e do PCE. Logo da caída da dirección guerrilleira en Galicia en xullo de 1948 asumiu a tarefa da reorganización da guerrilla sobre a base das consignas comunistas e iniciou un proceso de militarización, o que o levou a enfrontamentos cos enlaces e a rede de apoios, mesmo con acusacións de ser un infiltrado. Pouco despois de asumir formalmente a xefatura da guerrilla e a secretaría xeral do Comité Rexional do PCE en marzo de 1949 foi denunciado por Francisco Cano Román, un garda civil infiltrado no seo da guerrilla, morrendo o 22 de xuño de 1949 a mans da Garda Civil en Penacova, na parroquia de Remesar (Bóveda), xunto con Bernardo Álvarez Trabajo; un terceiro compoñente do grupo, Elías López Armesto, resultou malferido e morreu días despois. Foi substituído na secretaría do Comité Rexional por José Sevil.
Véxase tamén editar
Bibliografía editar
- Máiz, Bernardo (1988). Galicia na II República e baixo o franquismo. Vigo: Xerais.
- Redondo Abal, Francisco Xavier (2006). Botarse ao monte. Censo de guerrilleiros antifranquistas na Galiza (1939-1965). Sada: Do Castro. p. 64. ISBN 84-8485-231-8.
- Serrano, Secundino (2020). Maquis. Historia de la guerrilla antifranquista. Madrid: Temas de Hoy.