Katharine Murray Lyell
Katharine Murray Lyell, nada en 1817 e finada en 1915, foi unha botánica británica, autora dun libro pioneiro sobre a distribución mundial dos fentos e editora de volumes da correspondencia entre moitos dos científicos notábeis da súa época.
| Biografía | |
|---|---|
| Nacemento | 1817  Inglaterra |
| Morte | 1915 (97/98 anos) Londres |
| Datos persoais | |
| País de nacionalidade | Reino Unido de Gran Bretaña e Irlanda |
| Actividade | |
| Ocupación | botánica , pteridóloga , editora literaria , taxonomista , escritora técnica (pt)  , coleccionista de plantas |
| Obra | |
| Abreviación dun autor en botánica | K.Lyell |
| Familia | |
| Cónxuxe | Henry Lyell (1848–) |
| Fillos | Rosamond Frances Anne Lyell (en) , Francis Horner Lyell (en) , Leonard Lyell, 1st Baron Lyell (en) , Arthur Henry Lyell (pt) |
| Pais | Leonard Horner (en) e Anne Susan Lloyd (en) |
| Irmáns | Frances Joanna Bunbury (pt) , Susan Horner (pt) , Mary Horner Lyell, Leonora Pertz (en) e Joanna Baillie Horner (en) |
 | |
Biografía editar
Katharine Murray Horner era unha das seis fillas do comerciante e xeólogo escocés Leonard Horner. Leonard Horner deulle unha boa educación ás súas fillas e levábas ás reunións da British Association for the Advancement of Science.[1]
A irmá máis vella de Katharine, Mary, era xeóloga e conquilóloga. Casou co xeólogo Charles Lyell.[2] Katharine Horner casou despois co irmán máis novo de Lyell, Henry. O seu fillo máis vello, Leonard, chegou a ser membro Parlamento británico. A súa sobriña Dorothea Pertz tamén foi botánica.
Traxectoria editar
Como botánica, Katharine Lyell especializouse nos fentos e en 1870 publicou un volume sobre a distribución xeográfica dos fentos no planeta. No seu prólogo recoñece o moito que lle debía a William Jackson Hooker e ó seu compendio inacabado de fentos, Synopsis Filicum (publicado postumamente en 1868). Porén, o libro de Lyell foi o primeiro que usaba unha organización xeográfica no canto da habitual organización por taxonomía. Ela viaxou á India con Henry, onde recolleu plantas en varias rexións, entre elas o delta do Ganges, e carteouse con ilustres vitorianos da súa época, como os científicos Alfred Russel Wallace e Charles Darwin e a misioneira Harriette Colenso (quen lle recolleu fentos).[3] A súa colección de fentos está repartida entre os Kew Gardens e o Herbario da Universidade de Reading (RNG), mentres que o resto das súas outras plantas foron parar ao Museo Británico.
Lyell tamén editou varios libros de memorias e de correspondencia de tres destacados científicos do seu día. Cando o seu cuñado Charles morreu en 1875, converteuse na compiladora e editora dunha obra en dous volumes da súa biografía, diarios e correspondencia.[4] Unha década máis tarde, trala morte do seu pai, editou as súas cartas nunha obra en dous volumes. Tamén editou a biografía e cartas doutro dos seus cuñados, Charles Bunbury, un afamado paleobotánico. Todas estas obras seguen a ser un material de referencia para as persoas que investigan este período.
A abreviatura estándar de autoría K. Lyell úsase para indicar esta persoa cando se cita un nome botánico.
Obra editar
- Katharine Lyell. A Geographical Handbook of All the Known Ferns: With Tables to Show Their Distribution. Londres: John Murray, 1870.
- Katharine Lyell, ed. The Life, Letters and Journals of Sir Charles Lyell. Londres: John Murray, 1881.
- Katharine Lyell, ed. Memoir of Leonard Horner, F.R.S., F.G.S.: Consisting of Letters to his Family and from Some of his Friends. Londres: Women's Printing Society, 1890.
- Katharine Lyell, ed. The Life and Letters of Sir Charles J.F. Bunbury. Londres: John Murray, 1906.
Notas editar
- ↑ Ogilvie, Marilyn, and Joy Harvey. The biographical dictionary of women in science: pioneering lives from ancient times to the mid-20th century. Routledge, 2003.
- ↑ "Explorando nuevas fronteras: biólogas innovadoras, Dora Pertz y Florence Durham". Mujeres con ciencia (en castelán). 2018-01-03. Consultado o 2022-08-01.
- ↑ Guy, Jeff. The View Across the River: Harriette Colenso and the Zulu Struggle Against Imperialism. New Africa Books, 2001.
- ↑ Mary Lyell, quen en teoría era a máis indicada para realizar esta tarefa morrera en 1873.