José Martínez Palomar
José Martínez Palomar, nado en Valencia o 8 de outubro de 1939, é un exfutbolista e adestrador de fútbol español. Xogaba de porteiro e desenvolveu case toda a súa carreira como futbolista no Sabadell. Como adestrador dirixiu a varios equipos, a maioría deles valencianos, e tamén ao Sabadell e ao Deportivo da Coruña.
Pepe Martínez | |||
---|---|---|---|
Información persoal | |||
Nome | José Martínez Palomar | ||
Nacemento | 8 de outubro de 1939 (84 anos) | ||
Lugar de nacemento | Valencia | ||
Posición | Porteiro | ||
Carreira sénior | |||
Anos | Equipos | Aprs | (Gls) |
1958–1964 | Mestalla | 39 | |
1961–1964 | Valencia | 6 | (0) |
1964–1975 | Sabadell | 222 | (0) |
Adestrador | |||
1975–1976 | Alcoyano | ||
1976–1980 | Sabadell | ||
1980–1982 | Deportivo da Coruña | ||
1982–1984 | Levante | ||
1984–1985 | Alzira | ||
1985–1986 | Alcoyano | ||
1986–1988 | Sabadell | ||
1988 | Hércules | ||
1990 | Levante | ||
1991 | Levante | ||
1992–1993 | Sabadell | ||
1997–1999 | Ontinyent | ||
2000–2001 | Alzira | ||
Partidos e goles só en liga doméstica. [ editar datos en Wikidata ] | |||
Traxectoria editar
Xogou varios anos no filial do Valencia CF, o Mestalla, que compaxinou en ocasións co primeiro equipo, co que debutou na Primeira División o 19 de novembro de 1961, nunha goleada por 6-2 contra o FC Barcelona en Mestalla.
En 1964 fichou polo Sabadell, co que xogou durante as seguintes 11 tempadas, sete delas na Primeira División, despois de lograr o ascenso na súa primeira campaña. Disputou 247 partidos oficiais co club catalán e é o futbolista con máis encontros na Primeira División da historia do club, 151.
Colgou as luvas en 1975 e pouco despois comezou a súa carreira de adestrador, dirixindo primeiramente ao Alcoyano, na Rexional Preferente. A continuación pasou ao Sabadell, onde estivo cinco tempadas e co que ascendeu da Terceira á Segunda División.
Posteriormente adestrou o Alzira, Levante e outra vez o Alcoyano. Na tempada 1980/81 chegou ao Deportivo da Coruña, que caera ata a Segunda División B. Logrou o ascenso na súa primeira campaña, ao obter o segundo posto por detrás do Celta de Vigo, e continuou no posto ao ano seguinte en Segunda, ata que foi destituído e substituído por Luis Rodríguez Vaz.
Tras pasar polo Levante e polo Alcoyano, na tempada 1986/87 regresou ao Sabadell, agora en Primeira División, a metade de tempada, co obxectivo de conseguir a salvación, cousa que logrou, pero foi destituído na seguinte polos malos resultados. En 1988 fichou polo Hércules en Segunda B, sendo destituído o 3 de novembro.[1]
Preto do final da tempada 1989/90 fíxose cargo do Levante en Segunda, logrando a permanencia. Deixou o club ao remate da tempada, pero regresou mediada a seguinte, aínda que desta vez non conseguiu salvar o club do descenso.
O 13 de xaneiro de 1992 o adestrador valenciano iniciou a súa terceira etapa como técnico do Sabadell.[2] Aterrou no mercado de invierno substituíndo a Antonio Olmo, e o equipo acabou no 9º posto de Segunda División, o que lle valeu para continuar na 1992/93. Na tempada seguinte foi destituído a comezos de 1993. Posteriormente adestrou o Ontinyent e o Alzira, ambos na Segunda B.[3]
Foi tamén presidente do Comité de Adestradores da Federación de Fútbol da Comunidade Valenciana, dende 2008 ata 2018.[4]
Notas editar
- ↑ "Pepe Martínez, cesado" (PDF). Mundo Deportivo (en castelán). 4 de novembro de 1988. p. 23. Consultado o 12 de decembro de 2021.
- ↑ "Es imprescindible el diálogo". Mundo Deportivo (en castelán). 16 de decembro de 1992. p. 27. Consultado o 12 de decembro de 2021.
- ↑ "Pepe Martínez, tentado por un equipo chino" (en castelán). Arquivado dende o orixinal o 11 de abril de 2009. Consultado o 12 de decembro de 2021.
- ↑ "Pepe Martínez Palomar recibe la insignia de oro y brillantes de la Federación Española de Fútbol" (en castelán). 4 de maio de 2019. Consultado o 12 de decembro de 2021.