Wikipedia

Célula estrelada

Non confundir con outro tipo de células estreladas. Este artigo trata das células estreladas so sistema nervioso central. Para os outros tipos ver célula estrelada (homónimos).

As células estreladas son neuronas do sistema nervioso central, denominadas así pola forma de estrela que lle dan os seus procesos dendríticos que irradian desde o corpo celular. Moitas células estreladas son GABAérxicas e están localizadas na capa molecular do cerebelo.[1] As células estreladas derivan da división de células proxenitoras da substancia branca do cerebelo posnatal. As árbores dendríticas poden variar entre neuronas. Hai dous tipos de árbores dendríticas no córtex cerebral, as cales inclúen células piramidais, que teñen forma de pirámide, e células estreladas, con forma de estrela. As dendritas son tamén útiles para a clasificación. As dendritas con espiñas clasifícanse como espiñosas, e as que carecen de espiñas son aespiñosas.[2] As células estreladas poden ser espiñosas ou aespiñosas, mentres que as células piramidais son sempre espiñosas. As células estreladas máis comúns son as interneuronas inhibitorias atopadas dentro da metade superior da capa molecular do cerebelo.[3] As células estreladas cerebelares fan sinapse en árbores dendríticas das células de Purkinje e envían sinais inhibitorios.[4] As neuronas estreladas atópanse ás veces noutras localizacións no sistema nervioso central; as células estreladas espiñosas corticais atópanse na capa IVC do córtex visual primario.[2] No córtex do barril somatosensorial dos ratos e ratas, as células estreladas espiñosas glutamatérxicas (excitatorias) están organizadas nos barrís da capa 4.[5] Reciben fibras sinápticas excitatorias procedentes do tálamo e procesan excitación de anteroalimentación (feed forward) á capa 2/3 do córtex visual primario a células piramidais. As células estreladas espiñosas corticais teñen un padrón de disparo de impulsos "regular". As células estreladas son cromófobas, é dicir, son células que non se tinguen doadamente, o que explica que aparezan relativamente pálidas vistas ao microscopio.

Neuronas corticais con tinguidura de Golgi. A) Célula piramidal da capa II/III. B) Célula estrelada espiñosa da capa IV.
Microcircuitería do cerebelo. As sinapses excitatorias denótanse como (+) e as inhibitorias como (-).
MF: Fibra musgosa.
DCN: Núcleos cerebelares profundos.
IO: Oliva inferior.
CF: Fibra gaveadora.
GC: Célula gránulo.
PF: Fibra paralela.
PC: Célula de Purkinje.
GgC: Célula de Golgi.
SC: Célula estrelada.
BC: Célula cesta.

As células estreladas cerebelares son inhibitorias e GABAérxicas.[6] As células estreladas e as células cesta orixínanse na zona ventricular cerebelar (CVZ) xunto con células de Purkinje e a glía de Bergmann[7][8] Debido á súa semellanza, as células estreladas e as células cesta agrúpanse cando se examinan durante a migración, especialmente dado que seguen o mesmo camiño. Despois da mitose, estas células empezan a súa viaxe na capa profunda da substancias branca e migran pola capa granular interna (IGL) e a capa de células de Purkinje (PCL)[9] ata chegaren á capa molecular. Durante a súa presenza na capa molecular, cambian de orientación e posición ata que finalmente acaban na porción media desa capa, enfrontadas en dirección rostrocaudal.[10] Unha vez nesta capa, as células estreladas son guiadas ao seu lugar correcto polas células gliais de Bergman.[11]

As células estreladas GABAérxicas aespiñosas atópanse no córtex somatosensorial. Ademais da clasificación visual das dendritas aespiñosas, poden ser etiquetadas inmunohistoquimicamente con ácido glutámico descarboxilase (GAD) debido á súa actividade GABAérxica, e ocasionalmente colocalízanse con neuropéptidos.[12]

Notas editar

  1. ↑ Patterning and Cell Type Specification in the Developing CNS and PNS : Comprehensive Developmental Neuroscience. Elsevier Science. 2013. p. 215. ISBN 978-0-12-397265-1. 
  2. ↑ 2,0 2,1 Costa, Nuno Maçarico da; Martin, Kevan A. C. (2011-02-23). "How Thalamus Connects to Spiny Stellate Cells in the Cat's Visual Cortex". Journal of Neuroscience (en inglés) 31 (8): 2925–2937. ISSN 0270-6474. PMC 6623786. PMID 21414914. doi:10.1523/JNEUROSCI.5961-10.2011. 
  3. ↑ Patterning and Cell Type Specification in the Developing CNS and PNS : Comprehensive Developmental Neuroscience. (1 ed.). Elsevier Science. 2013. ISBN 978-0-12-397265-1. 
  4. ↑ Chan-Palay, Victoria; Palay, Sanford L. (1972-01-01). "The stellate cells of the rat's cerebellar cortex". Zeitschrift für Anatomie und Entwicklungsgeschichte (en inglés) 136 (2): 224–248. ISSN 0044-2232. PMID 5042759. doi:10.1007/BF00519180. 
  5. ↑ Petersen, Carl C.H. (outubro de 2007). "The Functional Organization of the Barrel Cortex". Neuron 56 (2): 339–355. ISSN 0896-6273. PMID 17964250. doi:10.1016/j.neuron.2007.09.017. 
  6. ↑ Rubenstein, John; Rakic, Pasko; Rubenstein, John (2013-05-06). Patterning and cell type specification in the developing CNS and PNS : comprehensive developmental neuroscience (1ª ed.). Academic Press. ISBN 9780123973481. 
  7. ↑ Comprehensive developmental neuroscience. Cellular migration and formation of neuronal connections (1ª ed.). Elsevier Science & Technology. 2013. p. 283. ISBN 978-0-12-397266-8. 
  8. ↑ "Cerebellar Ventricular Zone - Cellular Development, Function & Anatomy - LifeMap Discovery". discovery.lifemapsc.com. LifeMap Sciences. 
  9. ↑ Comprehensive developmental neuroscience. Cellular migration and formation of neuronal connections (1ª ed.). Elsevier Science and Technology. 2013. p. 284. ISBN 978-0-12-397266-8. 
  10. ↑ Rubenstein, John (2013-05-06). Patterning and Cell Type Specification in the Developing CNS and PNS : Comprehensive Developmental Neuroscience. Elsevier Science & Technology. ISBN 9780123973481. 
  11. ↑ Rubenstein, John (2013-05-06). Neural Circuit Development and Function in the Brain : Comprehensive Developmental Neuroscience. Elsevier Science & Technology. ISBN 9780123973467. 
  12. ↑ Conn, P. Michael (2008). Neuroscience in medicine (3ª ed.). Beaverton, OR: Humana Press. ISBN 9781603274548. 

Véxase tamén editar

Outros artigos editar

Ligazóns externas editar

Traído desde «https://gl.wikipedia.org/w/index.php?title=Célula_estrelada&oldid=6709594»