Wikipedia

Aeródromo de Rozas

aeródromo en Rozas (Mondriz, Castro de Rei)

Coordenadas: 43°07′01″N 7°28′13″O / 43.11694444, -7.47027778

O aeródromo de Rozas é un aeródromo situado no lugar de Rozas, na parroquia de Mondriz en Castro de Rei, a oito quilómetros[1] do centro da cidade de Lugo. Foi inaugurado o 4 de xuño de 1943, sendo o aeroporto central de Galicia ata a construción do aeroporto da Lavacolla. O aeródromo está destinado en xeral á aviación deportiva. Os terreos son propiedade do Ministerio de Defensa, e é xestionado polo INTA e polo Real Aeroclub de Lugo para os seus usos recreativos.

Aeródromo de Rozas

IATA: ningún – ICAO: LERO
Sumario
Tipo Privado
Propietario Ministerio de Defensa
Operador INTA / Real Aeroclub de Lugo
Cidade/Illa Lugo, Galicia
Localización Mondriz, Castro de Rei
Elevación (msnm) 443 metros / 1 453 pés
Web aerolugo.com
Pista(s)
Dirección Longo Superficie
metros pés
04/22 1 200 3 937 asfalto

Anualmente celébrase nas instalacións un dos maiores acontecementos aeronáuticos de aviación deportiva do norte peninsular, a "Volta Aérea a Galicia".[2]

Historia editar

Foi construído pola Luftwaffe alemá durante a segunda guerra mundial[3] con motivo de proporcionar un mantemento rápido das antenas do Radiofaro do sistema Consol de Arneiro. O aeródromo estaba constituído por tres hangares de considerables dimensións, que ademais dispoñían de barracóns auxiliares. O aeródromo era atendido por soldados do Exército do Aire español.

Unha vez finalizada a contenda, o aeródromo de Rozas foi recoñecido como un lugar excepcional para a creación dun aeroporto de maiores dimensións, e chegou a ser base aérea durante algún tempo no que había unha gornición militar de tropas de aviación. No ano 1949 o aeródromo de Rozas converteuse no aeroporto central de Galicia, situación que se mantivo durante dous anos mentres se levaba a cabo a construción do aeroporto da Lavacolla.

No ano 1953, a forza aérea decidiu desmantelalo e pouco a poouco caeu no esquecemento, chegando a pensarse no pechamento e no desmantelamento total das instalacións. O primeiro hangar desmontouse e foi trasladado a Palma en 1958, e outro deles á base aérea de Cuatro Vientos (Madrid) en 1959; o mesmo pretendían co terceiro e último pero, ante esta crítica situación constituíuse de maneira urxente e da man do por aquel entón alcalde de Lugo Ramiro Rueda Fernández, o Real Aero Club de Lugo, co fin de evitar a desaparición total das instalacións.

Unha vez aprobados os estatutos de devandita sociedade, e tralas pertinentes peticións ao ministro do Aire José Rodríguez Díaz de Lecea, conseguiuse manter o hangar que aínda se pode ver case no seu estado orixinal. Durante os anos 2008 e 2009 fixéronse importantes investimentos no aeródromo de Rozas por parte da Cámara de Comercio de Lugo,[4] como o peche perimetral da pista e a reforma da terminal pretendendo converter Rozas nun aeroporto de carga que tamén dispoña de voos a Madrid e a Barcelona.[5] A pista do aeródromo é de 1200×45 m, pista de tamaño semellante ás que dispoñen aeroportos como o de Sligo (Irlanda) ou o de Santos Dumont (Brasil), suficiente para avións de até 50-70 prazas turbohélices.

A Compañía Iberia usou esta pista durante dous anos.[3]

Centro de Investigación Aeroportada de Rozas editar

En 2015, o Instituto Nacional de Técnica Aeroespacial (INTA) inaugurou no aeródromo o CIAR modernizando o seu sistema de comunicacións e xestión cun investimento duns 3,3 millóns de euros. O centro tamén recibiu un investimento de dez millóns de euros da Xunta de Galicia cofinanciada con fondos Feder.[6][7] Estas melloras pretenden aumentar o atractivo como polo de referencia para ensaios e investigacións. O aeródromo de Rozas ofrece unha localización axeitada dada a obriga para os avións non tripulados de voar só en espazo restrinxido.[8]

Pretende integrar tanto as Plataformas Aéreas de Investigación (PAI) como os novos desenvolvementos con avións non tripulados (UAS), nun centro de investigación que ofrece as infraestruturas e equipamentos en terra necesarios para o desenvolvemento das aeronaves e a avaliación das campañas que hai que realizar con elas.[9]

En novembro de 2018, confirmouse o desembarco do xigante estadounidense Boeing en Rozas para desenvolver un simulador de tráfico aéreo para aeronaves tripuladas e non tripuladas. A inauguracón oficial tivo lugar o 18 de decembro de 2019.[8]

O vehículo non tripulado ATLANTE de EADS C.A.S.A realizou o seu primeiro voo no aeródromo de Rozas o 28 de febreiro de 2013.[10]

Notas editar

  1. ↑ "Centros de Vo a Vela: Rozas". Arquivado dende o orixinal o 11 de setembro de 2011. Consultado o 02 de outubro de 2010. 
  2. ↑ López, Laura (17 de xullo de 2014). "Aviones, paracaídas y globos llenarán el cielo lucense en el Criterium Aeronáutico". La Voz de Galicia. Consultado o 24 de decembro de 2014. 
  3. ↑ 3,0 3,1 "O aeródromo de Rozas". Arquivado dende o orixinal o 23 de setembro de 2010. Consultado o 02 de outubro de 2010. 
  4. ↑ "El aeródromo lucense de Rozas quiere reemprender el vuelo" Arquivado 12 de agosto de 2014 en Wayback Machine., artigo en El Correo Gallego, 3 de novembro de 2008 (en castelán).
  5. ↑ "El aeródromo de Rozas quiere reemprender el vuelo". www.elcorreogallego.es. 3 de novembro de 2008. 
  6. ↑ "Rozas certificará los drones de Europa". lavozdegalicia.es. 16 de decembro de 2019. 
  7. ↑ "Huelva y León rivalizan con Lugo por liderar el mercado de drones en España". www.abc.es. 12 de decembro de 2016. 
  8. ↑ 8,0 8,1 "Inauguración oficial del CIAR". 18 de decembro de 2019. 
  9. ↑ "INTA y Xunta de Galicia inauguran en Centro de Investigación Aeroportada de Rozas". infodefensa.com. 20 de decembro de 2019. Consultado o 30 de decembro de 2019. 
  10. ↑ "El avión no tripulado ATLANTE de Cassidian alza el vuelo en Lugo - Noticias Infodefensa España". 28 de febreiro de 2013. Arquivado dende o orixinal o 12 de outubro de 2013. Consultado o 19 de marzo de 2022. 

Véxase tamén editar

Outros artigos editar

Ligazóns externas editar

Traído desde «https://gl.wikipedia.org/w/index.php?title=Aeródromo_de_Rozas&oldid=6548178»