Acidose respiratoria

A acidose respiratoria é un trastorno do equilibrio ácido-base caracterizado por un pH inferior a 7,35 debido a unha patoloxía respiratoria.

Aviso médico

Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

A acidose prodúcese cando por mor dun problema ventilatorio vese elevada a presión parcial de dióxido de carbono (CO₂). O aumento da CO₂ produce un aumento dos protóns, causando unha baixada no pH sanguíneo. No organismo humano o CO₂ disóciase nunha molécula de auga e nunha de ácido carbónico (H₂CO₃), e este á súa vez disóciase no ión bicarbonato e nun hidroxenión. A acumulación de CO₂ ocasiona un aumento de hidroxenións e unha acidose.

Causas de acidose respiratoria

As causas deste trastorno metabólico localízanse a nivel respiratorio. Unha malfunción deste é a causa do incremento da CO₂. Son posibles varias causas:

• Alteracións no esqueleto: anomalías no tórax, como o pectus excavatum.
• Alteracións na musculatura respiratoria: poden ser doenzas xeneralizadas, coma a miastenia gravis ou localizadas, coma a parálise do diafragma.
• Alteracións nos centros respiratorios do sistema nervioso central, localizados no bulbo raquídeo ou na protuberancia. Un dos máis comúns é unha inxesta excesiva de depresores do sistema nervioso, como poden ser os barbitúricos ou derivados mórficos.

Complicacións

A depresión respiratoria pode producir unha parada cardiorespiratoria ou diversas arritmias, incluíndo fibrilación ventricular. A acumulación excesiva de CO₂ pode producir en casos leves cefalea e vómitos. En casos máis graves produce unha vasodilatación periférica e risco de shock distributivo. A súa toxicidade sobre estruturas vasculares pode producir o fenómeno contrario de vasoconstrición.

Tratamento

De forma xenérica pode ser precisa ventilación mecánica. Nalgunhas intoxicacións, o bicarbonato permite alcalinizar os ouriños e eliminar parte do tóxico, que adoita ser unha substancia ácida débil.

Na maioría dos casos é imprescindible o tratamento etiolóxico adoitado.

Notas

• Harrison, Principios de Medicina Interna 17ª edición. Páxina 292 (en castelán) ISBN 978-970-10-6676-8